Shillong, Naitung 21
Ka Hockey India ka la pynbna ïa ki 20 ngut ki rangïalehkai ki ban mihkhmat ïa ka kynhun ïalehkai ka ri sha ka lympung ïalehkai FIH Hockey World Cup Belgium & Netherlands 2026, kaba la buh ban long naduh ka 15 tarik haduh ka 30 tarik u Nailar.
U coach kane ka kynhun u Craig Fulton, u la pynpaw ïa ka jingshaniah ha ka kynhun, da kaba ong ba ka don jingkyrmen ba kan lah ha kaba ban ïalehkai bha.
U rangïalehkai ‘dien kane ka kynhun u Harmanpreet Singh un shimti kum u kapten, katba u rangïalehkai shapdeng u Manpreet Singh u la shah kynthup lang nalor kiwei pat ki rangïalehkai kiba la ju mlien ban ïalehkai bad la khmih lynti ba kin lah ban ïalehkai bha.
“Kane ka dei ka kynhun kaba ïahap bha namar la kynthup lang ïa kiba dangkham khynnah bad kiba la kham rangbah,” la ong u Coach u Fulton.
Ha ka liang ki nongapkol ki kynthup ïa u Mohith HS bad u Suraj Karkera. Ha ka liang ki rangïalehkai ‘dien ki long u Jarmanpreet Singh, Harmanpreet Singh, Amit Rohidas, Jugraj Singh, Sanjay, Sumit bad u Yashdeep Siwach.
Ha ka bynta kaba shapdeng ki kynthup ïa u Manpreet Singh, Hardik Singh bad u Vivek Sagar Prasad ha ryngkat u Nilakanta Sharma, Rajinder Singh bad u Aditya Arjun Lalage. Ha ka bynta kaba shakhmat ki kynthup ïa u Mandeep Singh, Dilpreet Singh, Abhishek, Sukhjeet Singh bad u Shilanand Lakra.
Kumba ka paw ka India ka la don ha ka Pool-D kaba kynthup lang ïa ka England, Pakistan bad ka Wales, ha kaba ïa ki jingïalehkai yn pynïalehkai ha Amstelveen, Netherlands.
Te kumta ka India kan sdang ïa ka jingïalehkai kaba nyngkong pyrshah ïa ka Wales ha ka 15 tarik u Nailar, ha kaba yn bud sa ka jingïakhun pyrshah ïa ka England ha ka 17 tarik bad khatduh eh ïa ka Pakistan ha ka 19 tarik.
