Shillong, Naitung 21
Ki ar ngut ki khlur ïalehkai karate ka Jylla hapoh ka lama jong ka All Meghalaya Karate Do Association (AMKA) ki la wanphai sha la ïing hadien ba ki la lah ban khur takma ha ka 10th Cadet, Junior, U-21 bad Senior South Asian Karate Cham -pionship 2026 kaba la long ha nongbah Dhaka, Bangladesh.
Kine ki long u Daniel Dabiangbha Warjri uba la khur ïa ka takma ksiar ha ka kyrdan ïalehkai jong ka Boys’ Junior Individual Kumite (-68kg) bad kum-juh u Gideon Tympuiñ uba la khur ïa ka takma rnong na ka kyrdan ïalehkai jong ka Men’s U-21 Individual Kata.
Kumban shu pynkynmaw ka jingïoh lad kine ki arngut ki samla ka AMKA ban mihkhmat ïa ka India sha kane ka rynsan ïakhun ka jia long hadien ka jinglah ban pynpaw ïa ka jingtbit bad ïalehkai bha ha ki lympung ïakhun kiba la long mynta ka snem.
Na ka liang u Gideon u lashah jied ban ïakhun ha kane ka rynsan ïakhun ha Dhaka hadien ba u la ïoh ban khur ïa ka takma ksiar ka 5th KIO Senior & U-21 National Karate Championship 2026 kaba la long ha nongbah Delhi ha u Rymphang. Katba u Daniel pat u la ïoh ban khur ïa ka takma rupa na ka kyrdan ïakhun ka Individual Kumite Junior -68kg category ha ka 5th KIO Sub-Junior, Cadet & Junior National Karate Championship 2026, kaba la long ha Dehradun ha u Jylliew mynta ka snem.
Ha kane ka jingwan phai sha la ïing jia ryngkhat ba kine ki arngut ki la ïakynduh lang ïa u Working President ka Meghalaya State Olympic Association ha Kolkata Bah John F Kharshiing, kiba la wanphai lang da ka juh ka liengsuiñ ha ka sngi Ba-ar ryngkat ka MLA ka East Shillong Dr. M. Ampareen Lyngdoh bad MDC barim ka Malki u Bah Bah Fantin Lakadong.
Shabar ka kad liengsuiñ la wan shaw pat ïa kine ki arngut ki khynnah da ki kmie ki kpa, ki bahaïing ha sem jong u Daniel Dabiangbha Warjri bad jong u Gideon Tympuiñ, bad na ka liang ka AMKA la mihkhmat da u Secretary Bah Ksan Kupar Warjri, u Coach Bah Donboklang Lyngdoh.
