Shillong, Naitung 22
Ka sngi kaba ar jong ka State Level Subroto Mukherjee Cup 2026 la sakhi ïa ki jingthep kol bun ki kynhun ïalehkai ha kaba ki la ïoh kham bun eh dei ka North Liberty HSS (West Jaiñtia Hills) bad ka Tyrsad HSS (East Khasi Hills) ha ka sngi Balang.
Ha ka jingïakhun jong ka U-17 ki kynthei kaba la long ha madan Heh Mini Stadium ha Mawlai, North Liberty ka la pynjem khnap ïa ka St. Claret HSS (South West Garo Hills) haduh 12-0 kol. Ka Elizabeth Thianglai (15′, 30′, 58′) ka la khur ïa ka hat-trick nalor kiwei pat kiba la noh synñiang ha ka jingthep kol.
Kumjuh ka Tyrsad ka la jop ïa ka Rangku Memo -rial Girls HSS (South Garo Hills) da 9-0 kol. Ka Ha-I-sha Myrthong (2′, 11′, 38′) ka la khur ïa ka hat-trick nalor kiwei pat ki ‘thei ïalehkai kiba la ïoh ban thep kol.
Ka Lotus SS (East Jaiñtia Hills) bad ka Rangthong Christian HSS (South West Khasi Hills) ki la ïakhaid khlem da lah ban thep kol. Katba ka Lurmangkara SS (West Khasi Hills) ka la jop da 4-0 kol ïa ka Montford SS (West Garo Hills) bad ka Natasha Kharjahrin (6′, 29′, 53′) ka la khur ïa ka hat-trick.
Ha ki jingïalehkai Under-15 ki shynrang ha SSA Stadium kaba ha Polo, ka Step by Step SS (East Jaiñtia Hills) ka la pynliem noh ïa ka St. Claret HSS (West Garo Hills) da 5-1 kol. Ka North Liberty ka la jop da 4-0 kol ïa ka Anderson HSS (West Khasi Hills).
Ka Umpohliew Jingtip HSS (East Khasi Hills) ka la pynjem khnap da 6-0 kol ïa ka Baghmara HSS (South Garo Hills), katba ka Little Star HSS (Eastern West Khasi Hills) abd ka Mangsang HSS (East Garo Hills) ki la ïakhaid mar 2-2 kol.
Haba phai sha ka kyrdan ïalehkai Under-17 ki shynrang ha madan MFA ha Polo, ka Bajengdoba HSS (North Garo Hills) ka la pynliem noh ïa ka Amwi HSS (West Jaiñtia Hills) da 4-3 kol. Ka Wapung SS (East Jaiñtia Hills) ka la jop da 4-0 kol ïa ka Okkapara SS (South West Garo Hills) ha kaba u Jeffarson Phawa (42′, 52′, 70′) u la khur ïa ka hat-trick.
Ka Myngken Chris-tian HSS (Ri-Bhoi) ka la pynliem noh ïa ka Little Star HSS (Eastern West Khasi Hills) da 5-1 kol. U Chanjib Chetry u la thep marwei haduh saw kol ha ka minit kaba 26′, 39′, 47′ & 51′ nalor kiwei pat kiba la ïarap ban noh synñiang lang na ka bynta ka kynhun.
Ka Dapboklang Giri Memorial SS (West Khasi Hills) ka la jop da 6-0 kol ïa ka Balang Mawlangwir HSS (South West Khasi Hills) ha kaba u Ïohborlang Lyngkhoi u la thep saw kol ha ka minit kaba 7′, 28′, 35′ & 43’.
Ka jingïalehkai group jong baroh lai tylli ki kyrdan ïalehkai kan kut ha ka sngi Palei na ka bynta ban ïaknieh rung sha ka semi final, ka ban long ha ka sngi Thohdieng.
