Gangtok, Naitung:
Ka jingïap jong ki briew na ka jingtwa jong ka lynti krem kaba dang shna ha ka NHPC Teesta Stage VI Hydropower Project ha Namchi distrik jong ka Sikkim ka la kiew sha ka 20 ngut haduh ba la thoh ïa ka khubor, ha kaba 5 ngut ki nongtrei ki dang sahkut bad shah khang lynti ha ka jingtwa na ka jingbthei jong ka Methane Gas kaba la wanrah pat ïa ka jingtwa khyndew.
Kat kum ka jingïathuh jong ka Superintendent of Police ka Namchi ka Sonam D. Bhutia, ki don 25 ngut ki nongtrei ba kynthup ïa ki heh jong ka projek, kiba la sahkut hapoh ka thliew ha Samardung tang hadien ka por 1 baje mynstep jong ka lah sngi U Blei. Na kine, 20 ngut la pynthikna ba ki la ïap, katba ka jingwad bad jingpyllait im ka dang bteng ban poi sha ki 5 ngut ki nongtrei kiba dang sah.
Kane ka jingjia ka la jia haba ka lyer Methane, kaba la lum ha kawei ka bynta jong ka thliew kaba jngai kumba 1.5 km na ka jaka rung, ka la bthei ha ka por ba pyrshang ban pynlait ïa ka lyer kaba la sahkut.
Ka jingbthei ka la wanrah ïa ka jingtwa khyndew hapoh ka lynti krem, kaba la khang ïa ka lynti mih bad kaba la set shapoh ïa ki nongtrei.
Ki la don arngut ki nongtrei kiba la ïoh ban phet noh kloi hadien ba la jia ka jingbthei. Hynrei ki heh pulit ki la ïathuh ba ki 25 ngut ki nongtrei ki la sahkut hapoh katei ka lynti krem.
Ka Deputy Commissioner jong ka Namchi, ka Anupa Tamling, ka la ong ba ïa ka jingkheiñ jong ki nongtrei kiba la sahkut la ïoh jingtip ba ki don 17 ngut hadien ka jingpynshisha ba nyngkong, hynrei na ka jingai jingkheiñ ka kompeni la tip ba ki don 25 ngut baroh kiba sahkut.
“La pynkylla ïa ka jingkheiñ katkum ka jingpynshisha ba nyngkong. Ka jingkheiñ ka lah ban dang kylla katba ki bor pynïaid ki dang bteng ban peit bniah ïa ki jingtip ba bniah bad ki heh jong ka kompeni bad ban pynshisha ïa ki jingthoh jong ka jingwan jong ki nongtrei kiba don ha katei ka jaka,” la ong ka Tamling.
Ka jingpyrshang ban pynlait im ka la shah khanglad jur namar ki jinglong jingman kiba shyrkhei hapoh katei ka lynti krem. Ki jingpyrshang ba nyngkong jong ki briew na ka tnad pynlip ding jong ka Rangpo la pynsangeh noh namar ka jingduna ka lyer oxygen bad ka jingdon jong ka lyer Methane, ha kaba la ïathuh ba ki don ki nongpyllait im kiba la shitom ha ka por ba ki don ha ka jingpyntreikam.
Ki kynhun jong ka National Disaster Response Force (NDRF) hadien ki la pyrshang ban rung shapoh katei ka thliew hynrei kim shym la lah ruh ban ïaid shakhmat namar ka jingbun ka gas bad ka jinglong jingman ka bym shngaiñ namar ka jingtwa khyndew.
Ka bor synshar jong ka Namchi ka la ong ba ïa ki kam pynlait im la pynlong lang da ka NHPC, State Disaster Response Force (SDRF), ka National Disaster Response Force (NDRF), ki pulit ka Sikkim, Fire and Emergency Services, Health Department bad kiwei pat ki tnat ba dei khmih halor kane ka bynta.
Ki heh ophisar na ka bor synshar distrik, ka NHPC, ki pulit bad ki tnad ba ïarap ha ki jingjia ba sngewsih ki dang sah ha katei ka jaka, ha kaba ki jingpyrshang ki long ban pynbha ïa ki kor ban ïarap ha ka ban ring bad pynhiar mynsiem hapoh ka thliew bad ban wad ïa ka lynti kaba shngaiñ ban poi sha kito kiba sahkut.
Ka Sikkim State Disaster Management Authority (SSDMA) ka la ong ba ka dang buddien bha ïa kane ka jingjia bad ba yn sa pynmih shuh shuh ïa ki jingpynbna katba nang mih ki jingtip ba kham bniah.
