Shillong, Naitung 22
U President ka USA, u Donald Trump u la pynpaw ïa ka jingkwah ba u President ka FIFA, u Gianni Infantino un long u Secretary-General ban wan jong ka United Nations, la pynpaw kat kum ki khubor kiba la mih ha ka New York Post.
La ong ba u Trump u sngewtynnad eh ïa ka rukom pynïaid jong u Infantino, ha kaba pynlong ïa ka FIFA World Cup bad u kyrmen skhem ba utei u heh na Switzerland, u don ïa ka sap ban pynïatylli ïa ki briew ha kylleng ka pyrthei.
Kat kum ka khubor, la ong u Trump u kyrmen skhem ba u Infantino un dei u kyrtong u ban mih plie ha ka jaka u Secretary General ba dangbat mynta ha ka UN u António Guterres, ha kaba ka samoi treikam jong u kan kut noh ha kaba kut jong u Kyllalyngkot.
Ka tyllong khubor ba u Trump u la pynpaw ha ka New York Post ba u Infantino u ïoh ka jingburom da baroh ha kylleng ka pyrthei, bad khamtam eh ba u don ïa ka sap ban pynïatylli lang kawei hapdeng ki briew ha kylleng ka pyrthei.”
Hynrei haduh mynta ym pat lah ban tip la u Infantino u don ne em ka jingthrang ban shimti ïa katei ka kam lane u Trump u la ïakren ne em ïa katei ka jingtyrwa bad u.
Ban long kum u Secretary-General jong ka UN, u kyrtong u dei ban ïoh shwa ïa ka jingkyrshan jong ka UN Security Council kaba don 15 ngut ki dkhot, ha kaba ki 5 ngut ki dkhot ba pura ki don ïa ka bor, hashwa ban mynjur da ka General Assembly jong ka UN.
Kat kum ki khubor la ong ba u Infantino bad u Trump ki don ka jingïadei kaba jan bha ha kaba ki la ïatrei lang na ka bynta ka FIFA World Cup, kaba la poi sha kaba kut.
La sakhi ba u Trump u la poi ha stadium bad sakhi ryngkat lang bad u Infantino na ka jaka shong ki heh ki haiñ ha ka jingïakhun phainal jong ka World Cup hapdeng ka Argentina bad ka Spain.
Ka jingïadei kaba jan u Trump bad u Infantino ka la shah phai khmat ha katei ka lympung ha kaba u rangïalehkai shakhmat ka USA u Folarin Balogun uba la shah sospon na ka bynta kawei ka jingïalehkai hadien ba u la shah sei red card, u la ïoh biang ban ïalehkai hashwa ka jingïakhun jong ka pre-quarter final pyrshah ïa ka Belgium.
