Shillong, Naitung 22
Ka lympung ïalehkai Common-wealth Games 2026 kan sdang mynta ka sngi Palei ha Glasgow, Scotland ha kaba yn wan shim bynta da kumba 3000 ngut ki nongïalehkai na ki 74 tylli ki ri.
Kane ka long ka sien kaba ar ba la pynlong ïa kane ka lympung ha Glasgow naduh ba ka la ïoh ban pynlong ha u snem 2014.
Te kumta ka India ka la khmih lynti ban ïalehkai bha bad ban khur takma ha kane ka lympung namar ka la sei haduh 125 ngut ki nongïalehkai na ki 13 tylli ki jingïalehkai bapher bapher, kynthup ïa ka para-sports.
Kumba ka paw ka tnad ïalehkai jong ka Sorkar Pdeng ka la pynlut palat T.53 klur tyngka ban pyn-khreh ïa ka kynhun ki nongïalehkai bapher bapher.
Ha kane ka lympung ka India kan sdang naduh ka sngi Palei da ka jingïalehkai lawn bowls jong ka Men’s Singles Group Stage bad ka Women’s Pairs Group Stage.
Ha ka Glasgow Games kaba la dep, ka India ka la lah ban ïalehkai bha ha kaba ka la jop ha ka jingïalehkai lawn bowl da kaba ka la khur kawei ka takma ksiar bad kawei ka takma rupa. Da kaba la weng noh katto katne ki jingïalehkai na kane ka lympung, la khmih lynti ba ka India ka la pynpaw ïa ka jingkhlaiñ na ka bynta ban khur takma athletics, weight-lifting bad ka boxing
Ha ka Athletics, u Neeraj Chopra uba la long u nongjop ha ka Olympic bad ka pyrthei, u la don jingkyrmen ban khur takma na ka bynta ka India ha ka jingkawang sum (javelin throw). La khmih lynti ba un ïatynjuh bor bad u nongjop ha ka Olympic na ka Pakistan, u Arshad Nadeem. Ka India ka la khmih lynti ban khur takma lyngba u Murali Sreeshankar ha ka long jump, u Praveen Chithravel ha ka triple jump, bad u Gulveer Singh ha ka jingïakop mareh (long-distance).
Ha ka weightlifting, ka khlur ïalehkai kaba la khur takma ha ka Olympic ka Mirabai Chanu ka la don jingkyrmen ban khur ïa ka takma ksiar ha ka 48kg jong ki kynthei. Kumjuh ka Bindyarani Devi bad ka Gyaneshwari Yadav ki la don jingkyrmen ban khur takma.
Ha ka boxing, yn lamkhmat ïa ka India da ka Lovlina Borgohain kaba la khur takma ha ka Olympic bad ka Jaismine Lamboria ka lahduh ha ka pyrthei. Kine ki ar ngut kin ïasoh lang ryngkat ka Sakshi Chaudhary bad ka Preeti Pawar, kiba la khmih lynti ban khur takma.
Nalor kine, ka India ka la khmih lynti ban khur takma na ka Tulika Maan ha ka jingïalehkai judo, ka kynhun ki nongïalehkai lawn bowls bad ka para-athlete ka Soman Rana, kiba don jingkyrmen ban khur takma na ka bynta ka ri.
