Shillong, Naitung 22
Ka Pomlakrai SC ka la long sa kawei pat ka kynhun kaba la jam sha ka semi final ha ka lympung ïalehkai SRGT 3rd Division Football League 2026, hadien ba ka pynliem noh ïa ka Lummawbah SC da 3-1 kol ha ka sngi Balang ha SSA Stadium, Polo.
Kane ka jinglah ban pynthikna ka la wan urlong lyngba ki ar kol ba la thep da u Vicky Kurkalang.
Nalor ka Pomlakrai, kiwei pat ki kynhun kiba la rung kham hashwa sha ka semi final ki long ka Sanmer SC, Umïew Naw U Sam bad ka Lamlynti FC.
Haba phai sha kane ka lympung ïalehkai ba la pynlong da ka Shillong Sports Association (SSA), ka jingïalehkai ka la long kaba itynnad bad kaba ïakhaid bha ha kaba ym shym la don kiba lah ban thep kol ha ka kylla step.
Dei ha ka kylla miet ba ka Pomlakrai ka la ïoh ban pynkhih jar nyngkong eh lyngba u Peacemaker Lyngdoh ha ka minit kaba 53. Kane ka kynhun ka la thep biang ïa ka kol kaba ar hadien ar minit lyngba u Vicky Kurkalang.
Hadien katto katne por u Vicky u la thep biang ïa ka kol kaba ar jong u ha ka minit kaba 72 na ka bynta ban tam 3-0 kol. Hynrei hashwa ban wai ka Lummawbah ka la lah ban pynphai kylla shi kol lyngba u Adelbert K. Sun (77) hashwa ba kan mad ïa ka jingshah rem.
Te kumta ka jingïakhun semi final kan long ha ka 27 tarik ha kaba ka Pomlakrai kan ïakynduh pyrshah ïa ka Sanmer, katba ha ka 28 tarik ka Umïew Maw U Sam pyrshah ïa ka Lamlynti. Kine ki jingïalehkai kin long ha ka por 3:30 nohphai sngi ha SSA Stadium.
Katba ïa ka jingïakhun phainal la buh ban pynlong ha ka 1 tarik u Nailar ha ka por 3 baje nohphai sngi.
