Imphal, Naitung:
Ka Indigenous People’s Forum, Manipur (IPFM) bad ka Delhi Meetei Coordination Committee (DMCC) ha ka sngi Ba-ar ki la dawa ban kem mardor bad pynngat ha ki kyndon aiñ ïa baroh kiba shah suba donkti ha ka jingpynïap ïa ki 6 ngut ki riew paidbah kiba dei ki Naga bad dawa ruh ban pynduh noh ïa ka jingïasoi jong ka Suspension of Operations (SoO) bad ki kynhun lehnoh Kuki.
Ha ka jingpynbna ba ïatreilang, ki seng ki la pynpaw ïa ka jingïatylli bad ki bahaïing hasem jong ki hynriew ngut ki riew paidbah Naga ïa kiba la lap ïa ki met ïap jong ki hajan Leilon Vaiphei ha ka 10 tarik u, Jylliew.
La ong, ba kane ka jingjia ka la jia na ka jingkiew bitar u Chairman jong ka Kuki Zo Council ha kaba la pynshisha ba ka jingïap jong kine ki briew ka la long da ka jingshah pynïap namar ka jingbakla da ki dkhot jong ka kynhun jait bynriew.
Ki ar tylli ki seng ki la kynnoh ruh ba katba 14 ngut ki jait bynriew Kuki la pyllait noh da ki jaitbynriew Naga halor ki nongrim jong ka jinglong briew, hynrei 6 ngut kiba shah rahbor kiba dei ki Naga ki la shah pynshitom beiñ bad shah pynïap.
Kiba la shah pyllait im, ki la ïathuh ba kiba shah pynïap ki la shah pynbor ban bam ïa ka doh kaba kim tip ka dei ka doh aïu bad ki kynthei Naga kiba la shah set bad kiba la shah pynshitom ki la shah ktah ha ka Post-traumatic stress disorder (PTSD).
Ki seng ki la kynnoh ba la palat shibnai naduh ba jia katei ka jingjia, hynrei ki nongleh kam sniew kiba kongsan ki dang ïoh laitluid watla la ithuh ïa ki nongleh kam sniew.
“Ngi ïeng ha ka jingïatylli kaba khlem artatien ryngkat ki longïing jong ki Naga bad ki Meetei kiba la duhnoh ïa ki baïeid bathoiñ jong ki, da kaba dawa na ka sorkar pdeng bad ka sorkar Manipur ban pynthikna ban kem kloi bad pynngat ha ki kyndon aiñ ïa baroh kiba shah suba donkti kiba ym pat shah leh ei ei ha ka aiñ,” ong ka kyrwoh khbor.
