Imphal, Naitung:
San ngut ki briew, kynthup ïa uwei u nongshalan drok ba hehduh uba la shah thwet halor ki mukotduma ba ïadei bad u drok ba bun jait, ki la shahkem ha ka por ba la pynlong ïa ka jingpyntreikam ban pyrshah drok kaba kyrpang ba la pynlong da ki pulit ka Manipur bad kiwei kiwei ki bor pynjari aiñ ha ka 22 tarik u Naitung.
Ka kynhun ba la ïatreilang jong ki pulit ka Manipur bad ka Narcotics Control Bureau (NCB) ka la ïoh ban kem ïa u Nengjatuan uba la ju tip ruh kum u Tuanpi ha ka por ba ki leit ban khynra ha Hotel Venus ha Churachandpur.
Ki pulit ki la ïathuh ba une uba shah kynnoh la suba ba u dei u nongshalan drok ba kongsan bad la thwet ïa u ha ki katto katne ki mukotduma ba la mudui hapoh ka Narcotic Drugs and Psychotropic Substances (NDPS) Act da ka NCB, ka Directorate of Revenue Intelligence (DRI) bad ki pulit ka Manipur.
Ha kawei pat ka jingkhynra kaba la pynlong ha kylleng ka Mantripukhri Bazar, ki bor pahara ki la ïoh ban kurup 3.66 kg u drok ba la suba ba u dei u drok bad ki la ïoh ban kem ïa lai ngut ki briew. Ïa kine kiba la shahkem la tip kyrteng kum u Anil Das (75), uba dei na Belghati bad uba sah mynta ha Mantripukhri, Roshan Basnet (48) na ka shnong Kanglatongbi Hathikhuwa, bad ka Goma Karki (33) kaba dei ruh na Kanglatongbi Hathikhuwa.
Shuh shuh ha kawei pat ka jingkhynra ki pulit ka Manipur ki la ïoh ban kem ïa ka Tinnei Thadou (52) kaba shong ba sah ha Lonpi Khunou ha Chandel distrik kaba dei na ka thaiñ Songja Khopi jong ka Churachandpur. Ki pulit ki la ïoh kurup kumba 1.6 kg u brown sugar ha ka jingkhmih bniah na ka.
Ïa kane ka jingkem bad kurup la leh kum shi bynta jong ka jingpyntreikam ban ïakhun pyrshah ïa u drok kaba dang ïaid shakhmat jong ka jylla kaba thmu ban tehlakam ïa ka jingkhaïi bad jingshalan beaiñ ïa u drok.
