Guwahati, Naitung:
Kumba la sakhi, la ong ba ki jinglong jingman jong ka jingshlei um ha Assam ka la nang jur namar ka jingbym sangeh jong ka jinghap slap, kaba la pynshlei ïa ki wah ha kaba la tam ïa ki dak ba bun jingma na ka jingshlei um, ha kaba kane ka la pynduh jaka sah ïa ki hajar ngut bad wanrah ïa kiba bun ki jingjulor.
Katkum ka jingkheiñ jong ka Assam State Disaster Management Authority (ASDMA), la ong ba ki la don 10 ngut ki briew ba kynthup ïa 4 ngut ki khynnah rit, kiba la duh ei ïa la ka jong ka jingim tang ha ki 24 kynta ba ladep bad baroh kiba ïap ha ka jylla, ki la poi sha ka 41 ngut.
La ïathuh ba ki don lai ngut kiba ïap ha Sivasagar distrik bad lai ngut ha Jorhat distrik. Arngut ki briew ki la ïap ha Charaideo distrik. Uwei u briew u la ïap ha Dhemaji bad Karbi Anglong distrik.
“Lai ngut ki briew ki la ïap namar ka jingshlei um ha Sivasagar bad Jorhat, arngut ha Charaideo distrik bad mar uwei ha Dhemaji bad Karbi Anglong distrik. Haduh mynta, ki la don haduh 41ngut ki briew kiba la duh noh ïa la ka jong ka jingim ha kane ka jylla namar ka jingshlei um,” la ong ka ASDMA ha ka kaiphod jong ka halor ka jingshlei um.
Haduh mynta kiba dang jah rngai ki la don 6 ngut ba kynthup ïa 3 ngut ki shynrang bad 3 ngut ki kynthei. Ki la don palat 6.5 lak ngut ki briew kiba la shah ktah ha kylleng ki 11 tylli ki distrik.
Ka jingshlei um ka la tap ïa ki 939 tylli ki shnong kiba hap hapoh ki 40 tylli ki Revenue Circles, kaba la ktah haduh 6.53 tam lak ngut ki nongshong shnong ha kylleng ki 11 tylli ki distrik, Karbi Anglong, Golaghat, Charaideo, Kamrup, Sivasagar, Jorhat, Dibrugarh, Nagaon, Hojai, bad Kamrup (M).
Kumba la ïathuh, la ong ba ha ka miet jong ka sngi Ba-ar, ha kaba sa 21 ngut ki briew ki la duh noh ïa la ka jong ka jingim ha ki 24 kynta ba ladep bad baroh kiba ïap ki la poi sha ka 31 ngut, ong ka khubor ba la pynmih da ka Assam State Disaster Management Authority (ASDMA).
Ban ai jingïarap ïa ki longïing kiba la shah pynkynriah jaka, ki bor synshar distrik ki la buh 273 tylli ki jaka ai jingïarap bad jaka sah ba shipor bad ki jaka sam jingïarap, ha kaba palat 1.14 lak ngut ki briew ki dang sah ha kine ki jaka haduh mynta.
Ka jingpyllait im bad ka jingïarap ka la nang bteng, ha kaba ki shipai India, ki shipai suiñ India, ki shipai National Disaster Response Force (NDRF), ki Shipai State Disaster Response Force (SDRF), ki pulit Assam bad ki bor synshar distrik ki la ïatreilang ban pynlong ïa ki jingpynkynriah jaka bad ai jingïarap ha ki jaka ba shah ktah ha ka jingshlei um.
Ha Jorhat distrik, ka kynhun ki NDRF ki la pynlong ïa ka jingpyllait im ha ki thaiñ Seleng Ghat hajan ka Seleng Tea Estate kaba hap hapoh jong ka Teok Revenue Circle hadien ba ki la ïoh ïa ka jingpynbna na ka District Disaster Management Authority (DDMA).
