Shillong, Naitung 23
Ka All Meghalaya Karate Do Association (AMKA) ka la sdang ïa ka lympung ïalehkai 32nd State Level Inter School Karate Tournament 2026 ha ka sngi Palei ha Multi Purpose Indoor Sports Hall jong ka SAI Training Centre.
Ha kane ka lympung la wan shim bynta da 802 ngut ki nongshim bynta kynthei bad shynrang na ki 126 ki skul jong kane ka Jylla naduh ki heprit haduh kiba la heh la san.
Ïa kane ka lympung la wan ban plie da u Working President ka Meghalaya State Olympic Association (MSOA) u Bah John F. Kharshiing ha ryngkat ka jingïadon lang u General Secretary ka MSAO u Bah Finely L, Pariat, ki dkhot nongkitkam ka AMKA bad kiwei kiwei.
Kane ka lympung ka dei kaba la ju pynlong manla u snem na ka bynta ban jied ïa ki nongïalehkai ba kynsai ki ban mihkhmat ïa ka Jylla sha ki lympung ïalehkai National Level bad ruh ban pynkhreh ïa ka 39th National Games ka ban long ha u snem 2027 ha kane ka Jylla.
Haba ai jingkren ha katei ka sngi u Bah John Kharshiing u la ai khublei ïa ka AMKA kaba la lah ban pynlong ïa kane ka lympung ïalehkai ha ka sien kaba 32 bad kane ka pyni ïa ka mynsiem ka jingtrei shitom ki nongkitkam na ka bynta ban kyntiew bad saiñ dur ïa ka lawei ki khynnah ha kane ka jingïalehkai.
Ïa kane ka lympung yn pynkut ha ka sngi Saitjaiñ ban rah ïa ki nongjop napdeng kitei ki khynah kiba wan shim bynta.
