Shillong, Naitung 23
Ka lympung ïalehkai State-Level Subroto Mukherjee Cup Football Tournament 2026 ka la jam sha ka semi final ha ka sngi kaba lai ha kaba ki kynhun kin ïaknieh rung final ha la ki jong ki kyrdan mynta ka sngi Thohdieng.
Ki kynhun ki ban ïakhun semi final ha ka kyrdan ïalehkai Under-17 Boys kin long hapdeng ka Dapbok-lang Giri Memorial SS (West Khasi Hills) pyrshah ïa ka Wapung HSS (East Jaiñtia Hills) bad ka O.M. Roy Memorial HSS ïa ka Bajengdoba HSS (North Garo Hills).
Ha ka semi final Under-15 boys, ka Little Star HSS (Eastern West Khasi Hills) kan ïakynduh pyrshah ïa ka North Liberty HSS (West Jaiñtia Hills) bad ka Umpohliew Jingtip HSS (East Khasi Hills) ïa ka Step By Step Sec School (East Jaiñtia Hills).
Katba ka semi final jong ka Under-17 girls, kan long hapdeng ka North Liberty HSS pyrshah ïa ka Lurmangkara Sec School (West Khasi Hills) bad ka Nongjri Presbyterian SS (Ri Bhoi) ïa ka Little Star HSS (Eastern West Khasi Hills).
Haba phai sha ki jingïalehkai group kiba khatduh jong ka U-15 Boys ha SSA Stadium, Polo ha ka sngi Palei, Anderson ka la jop da 2-1 kol ïa ka Don Bosco HSS (West Garo Hills). Ka Myngken Christian ka la pynliem noh ïa ka St. Claret (South West Garo Hills) da 4-0 kol. Ka Chusok Rikko N. Arengh (East Garo Hills) ka la ïakhaid mar 1-1 kol pyrshah ïa ka Maharam Govt. HSS (South West Khasi Hills). Katba ka Umpohliew Jingtip (East Khasi Hills) ka la jop da 5-0 kol ïa ka Dilma Apal HSS (North Garo Hills) bad u Borntius Dkhar (17, 40 & 43) u la khur ïa ka hat-trick.
Ha ka U-17 (boys) kaba la long ha madan MFA ha Polo, ka O.M. Roy ka la pynliem noh ïa ka Myngken Christian da 4-3 kol bad u Banaijingshai Kharkongor (38, 53 & 67) u la khur ïa ka hat-trick. Ka Karukol HSS (South Garo Hills) ka la pynliem noh ïa ka Dapboklang Giri Memorial West Khasi Hills) da 3-1 kol. Ka Bajengdoba HSS (North Garo Hills) ka la jop da 1-0 kol ïa ka Govt. Boys (West Garo Hills). Ka Wapung HSS (East Jaiñtia Hills) ka la jop da 5-1 kol ïa ka St. Paul HSS (East Garo Hills).
Haba phai sha ka U-17 (Girls) kaba la long ha Madan Heh Mini Stadium, ka North Liberty ka la pynjem khnap ïa ka Upper Kharkutta U.P.S (North Garo Hills) haduh 14-0 kol. Ka Baïarbha Nongrum ka la thep marwei haduh saw kol ha ka minit ba 3, 7, 20 & 25, katba ïa ka hat-trick la ïoh da ka Saphika Pyrtuh (12, 15 & 27).
Ka Nongjri Presbyterian SS (Ri-Bhoi) ka la pynliem noh ïa ka Rangthong Christian HSS (South West Khasi Hills) da 3-0 kol. Ka Montfort (West Garo Hills) ka la jop da 2-0 kol ïa ka Kasturba Gandhi Balika Vidyalaya (East Garo Hills) bad ka Little Star (Eastern West Khasi Hills) ka la jop da 1-0 kol ïa ka Tyrsad HSS (East Khasi Hills).
