Shillong, Naitung 24
Ki nongïalehkai karate ba kham khynnah tam jong ki Jylla ki la pyni ïa ka sap ba ki dang kiew ha ka sngi ba ar jong ka lympung ïalehkai karate ka 32nd State Level Inter School Karate Tournament 2026 ha Multipurpose Indoor Hall kaba don ha Sports Authority of India centre kaba don ha NEHU Shillong Campus ha ka sngi Thohdieng 24 Naitung 2026.
Kane ka lympung kaba lai sngi la pynlong da ka All Meghalaya Karate-Do Association (AMKA) ryngkat ka jingkyrshan jong ka Directorate of Sports and Youth Affairs.
Haduh 400 ngut ki nongïalehkai karate ka (karatekas) ha ka rta 6-10 snem na kylleng ka Jylla ki la ïakhun pyrshah iwei ïa iwei pat ha ki jingïalehkai kumite (sparring) bad ka ‘kata’ (demonstration), la kyrshan da ki paralok bad ki bahaïing-hasem na ki jaka peitkai. Kane ka long kumba shiteng na ka rekod jong ki 802 ngut ki nongshim bynta kiba la pynrung kyrteng ban ïashim bynta ha kane ka lympung ïalehkai.
Bun na ki nongïalehkai karate ba la kham san bha jong ka Meghalaya ki la sdang ïa ka jingïaid lynti jong ki ha ki kyrdan ba dang rit bha bad ka jingaiti jong ka AMKA ïa ki samla ka long ka jingpyni kaba shisha bha ïa ka jingong ha ka ktien English “Catch them young”.
Ha ka 25 Naitung 2026 sngi Saitjaiñ kan long ka sngi kut jong kane ka lympung, ryngkat bad ki jingïalehkai ba khatduh bad ka jingpynkut kan long ha ka por janmiet.
