Agartala, Naitung:
U Myntri Rangbah jong ka jylla Tripura u Manik Saha, ha ka 23 tarik, Naitung, u la plie ïa ki katto katne ki kam pynroi jong ka Agartala Municipal Corporation ha Swami Vivekananda Maidan ha ka nongbah bad u la ai jingkren ha ki paidbah ha katei ka sngi.
U Saha u la ong ba ka sorkar jylla ka dang ïai bteng ban pyntreikam ïa ki kam pynroi bapher bapher da ka jingthmu ban pynkylla ïa ka Agartala sha ka nongbah kaba khuid, kaba jyrngam, kaba koit ba khiah, kaba la pynïaid da ka teknoloji bad kaba ïadei bad ki nongshong shnong, kaba pynlong ïa ka kum kawei na ki jaka sor kaba don jingkyrmen tam ha ka thaiñ Shatei-Mihngi.
U Saha u la pynpaw ba ka thong ba kongsan jong ka sorkar ka long ban kyntiew ïa ka jingim jong ki nongshong shnong da kaba pynthikna ïa ki jingshakri paidbah kiba mynta, kiba lah ban ïoh bad kiba bha lyngba ka jingpyndonkam ïa ka teknoloji, ka jingshai bad ka jingkitkhlieh.
“Lyngba ka jingïaid lynti jong ka roi ka par, ngi kwah ban poi sha ki paidbah lyngba ki kam jong ngi,” ong u Saha, da kaba pynpaw ïa ka jingshaniah ba ki jingthmu ba thymmai ba la plie kin don ka bynta kaba kongsan ha ka roi ka par baroh kawei jong ka Agartala.
