Shillong, Naitung 24
Ka Seng Samla Mawlai Pyllun (SSMP) hynne ka sngi ka la pynkup burom ïa arngut ki heprit u Mekhamkhraw Nongrem bad u Donald Myrthong na ka bynta ka nam bad ka burom ba ki la wanrah ïa ka Meghalaya lyngba ka jingïadon bynta jong ki ban ïarap ïa ka Minerva Academy FC, Punjab ban ïohrah kum ka Nam Lahduh jong ka Gothia Cup 2026 kaba la long ha Sweden bad ïa ka Helsinki Cup kaba la long ha Finland.
Ka Minerva ka la ïohrah da kaba pynliem ïa ka kynhun na Brazil ka RS Sports Yellow da 2-1 kol ha ka jingïakhun ïa ka final jong ka Gothia Cup. Katba ki la ïohrah ïa ka Helsinki Cup da kaba pynliem ïa ka HJK Helsinki da 1-0 kol ha ka jingïakhun ïa ka final.
Haba kren sha ki lad pathai khubor, u President ka SSMP u Bah Samuel Biam u la ai khublei bad pyrto ïa kine ki arngut ki heprit kiba long ki nongmuna ïa kiwei ki khynnah kiba ïalehkai phutbol.
U ong ruh ba kine ki khynnah ki la rah ïa ka burom jong ka Meghalaya bad ïa ka India bad ki la pynsngewsarong ïa ka jaidbynriew baroh kawei.
U la pynpaw ba lada ka India ka ïoh rung sha ka World Cup, lehse kine ki arngut kin long ki rangïalehkai ban mih khmat ïa ka India.
U la ïaroh ruh ïa u trai bad u Coach ka Minerva FA u Rajat Bajaj, ba u angnud bha ban kyntiew ïa ki hep kiba rit bad u kwah ba ka India kan poi ha ka kyrdan kaba kin lah ban ïakhun ïa ka World Cup bad lyngba kane ka academy kine ki arngut ki heprit lehse kin long ka lawei jong ka ri India.
Ha kane ka sngi ka SSMP ka la noh jiingïarap ruh sha kine ki heprit.
