Shillong, Naitung 24
Ka lympung ïalehkai phutbol Subroto Mukherjee Cup 2026 ha ka kyrdan jong ka Jylla ka la poi sha ka bynta kaba kham shongshit bha mynta ka sngi katba ka jingïakhun semi-final ka la ïaid shakhmat ha kylleng ki kyrdan jong ki shynrang kiba hapoh 15 snem, ki shynrang kiba hapoh 17 snem, bad ki kynthei kiba hapoh 17 snem. Kaba la pynlong da ka Directorate of Sports & Youth Affairs, ki jingïalehkai ki la long ha madan SSA Stadium bad ha madan MFA Turf, Polo, la sakhi ïa ki jingpyni sap ba kyrpang, ka jingkut jingmut, bad ka jingtbit ïalehkai na ki samla ba donsap ka Meghalaya.
Kane ka lympung ka ïeng kum ka jingpynshisha ïa ka jingkular ba khlem artatien jong ka Sorkar Jylla, ba la ïalam da ka jingïalam ba don jingthmu jong u Myntri Rangbah ka Jylla, ban wad bad pynroi ïa ki sap ba shapoh, ban pynthikna ba ki samla jong ngi kin long kiba la pynkhreh ban mihkhmat ïa ka Meghalaya ha ki rynsan jong ka ri bad ka pyrthei.
Ha ka kyrdan Under-15 jong ki shynrang ki jingïalehkai Semi-Final ha madan MFA Turf, Polo ka North Liberty Hr. Sec. School (West Jaintia Hills) ka la ïoh ban rung sha ka final lyngba ka jingjop ba pura da 2-0 kol ïa ka Little Star Hr. Sec. School (Eastern West Khasi Hills). Ki kol la ïoh ban thep da u Malcolm Nongbsap ha ka minit ba (19′) bad Man-i-khan Kyndiah (35′).
Ha ka jingïalehkai kaba la ïakhun tyngeh bha, ka Umpohliew Jingtip Hr. Sec. School (East Khasi Hills) bad ka Step by Step Sec. School (East Jaintia Hills) ki la kut noh da ka jingïakhaid kaba khlem lah thep kol ha ka por ba la buh. Hynrei ka jingïalehkai la bteng bad rai lyngba ka penalty shootout, ha kaba ka Umpohliew Jingtip Hr. Sec. School ka la jop noh da 3-2 kol.
Katba ha ka kyrdan Under-17 jong ki shynrang ha ka jingïalehkai Semi-Final ha madan MFA Turf, Polo ka Wapung Hr. Sec. School (East Jaintia Hills) ka la pyni da ka jingïalehkai kaba khlain bha da kaba jop noh ïa ka Dapboklang Giri Memorial Sec. School (West Khasi Hills) da 5-0 kol, u Kamwamutmi Dkhar u la thep kol ha ka minit ba 20′ bad 69′ bad u Jeffarson Phawa 55′ & 61′, katba u Donbor Dkhar shi kol ha ka minit ba 28′.
Kumjuh ka O.M. Roy Memorial Hr. Sec. School (East Khasi Hills) ka la jop kput ïa ka Bajengdoba Hr. Sec. School (North Garo Hills) da 7-0 kol, u Lamshai Jana u la sdang ban thep kol na bynta ka kynhun da ka hat-trick lyngba ki kol ha ka minit ba 7′, 21′ & 58′, katba Ebenezer Sun ar tylli ki kol ha ka 9′ & 23′ minit, u Jonathan Kharbani shi kol ha ka 70′ bad u Deiwamut Syiem shi kol ha ka 72′ minit.
Haba phai pat sha ka jingïalehkai Semi-Final jong ki kynthei ha ka kyrdan Under-17 ha madan SSA Stadium, Polo
Ka North Liberty Hr. Sec. School (West Jaintia Hills) ka dang bteng da ka jingjop ha ka jingïaidlynti kaba khlain bor lyngba ka jingjop da 5-0 kol ïa ka Lurmangkara Sec. School (West Khasi Hills). Ki kol la sdang ban thep da ka Receive Ksoo ha ka minit ba 3′, kaba bud sa ka kol ka Saphika Pyrtuh (15′), Baiarbha Nongrum (17′), Peacefully Pohphlet (24′), bad Elizabeth Thanglai (37′).
Katba ka Little Star Hr. Sec. School (Eastern West Khasi Hills) ka la ïakhun tyngeh ban jop da 2-0 kol ïa ka Nongjri Presbyterian Sec. School (Ri-Bhoi). Ka Genefa Myrthong ka la thep kol ha ka minit ba 45, bad Bansara Rynsiang ha ka minit ba 64.
Kane ka lympung ka la pynkhreh mynta ïa ka jingpynkut kaba itynnad lyngba ki jingïalehkai ban long ha ka 25 tarik Naitung, 2026. Ha kaba ha ka kyrdan Under-15 jong ki shynrang ka jingïakhun final kan long hapdeng ka North Liberty Hr. Sec. School (West Jaintia Hills) pyrshah ïa ka Umpohliew Jingtip Hr. Sec. School (East Khasi Hills). Katba ha ka kyrdan Under-17 jong ki shynrang ka jingïaknieh nam lahduh kan long hapdeng ka Wapung Hr. Sec. School (East Jaintia Hills) bad ka O.M. Roy Memorial Hr. Sec. School (East Khasi Hills).
Katba ha ka liang ki kynthei ha ka kyrdan Under-17 ka jingïakhun final kan long hapdeng ka North Liberty Hr. Sec. School (West Jaintia Hills) pyrshah ïa ka Little Star Hr. Sec. School (Eastern West Khasi Hills).
