Guwahati, Naitung:
Ki jingkhot ban pyllait noh ïa ki lai ngut ki samla kiba la shah kem ha ka District Lakhimpur jong ka Assam halor ka jingkynnoh ba ki donkti ha kaba pynlong ïa ka jingïakhih ba la kyrshan da ka Cockroach Janata Party (CJP) ki nang jur, ha kaba ki bahaïing bad ki nongkyrshan ki kynthoh ba ka jingthmu jong ka jingïakhih ka la dep ban urlong.
Kine ki lai ngut ki samla ki dei kiba la tip kyrteng kum u Monjur Rahman (23), u Ashraful Islam (21), bad u Abdul Kasem (23), baroh ki dei ki nongshong shnong jong ka Laluk ki la shah kem ha ki pulit ka Laluk ha ka 23 tarik, Naitung, halor ka jingkynnoh ba ki thmu ban pynlong ïa ka jingïakhih ban kyrshan ïa ka jingiakhih jong ka CJP ha baroh kawei ka ri halor ka jingdawa ban phah hiar shuki ïa u Dharmendra Pradhan Myntri ka tnat pule- puthi ka sorkar pdeng halor ka jingkynnoh ba ka la don ka jinglait tuh jong ki jingkylli ka NEET Examination.
Katkum ka jingïathuh jong ki bahaïing jong ki, ki lai ngut ki la thaw ïa ka kynhun WhatsApp ban pynïasoh ïa ki nongïashim bynta na ka bynta kaei kaba ki pynneh pynsah ba ka dei ka jingïakhih kaba suk kum ka jingïatylli bad ka jingïakhih ha ka ri baroh kawei.
Na ka liang jong ki pulit ki la buh jingmudui ïa kine ki lai ngut ha Laluk Police Station Case No. 149/26 hapoh ki kyndon 61(2)(b), 353(1), bad 152 jong ka Bharatiya Nyaya Sanhita (BNS).
Ki bahaïing ki la buh jingkylli balei ki samla ki dang sah ha phatok, da kaba ong ba ka jingdawa jong ka jingïakhih ka la dep ban pyndep hadien ba la pynbna ba u Dharmendra Pradhan u la iehnoh kam.
Ki la kyrpad ïa ki bor ba dei peit ba kin pyllait noh ïa kitei ki lai ngut khlem da pynslem shuh.
Kine ki jingshah kem ki la ïoh ruh ïa ka jingshah kynthoh na ki bynta jong ka imlang sahlang, khamtam na ki samla, kiba kynthoh ba kiba shah kynnoh ki pyndonkam ïa ka hok synshar paidbah jong ki ban pynlong ïa ka jingïakhih kaba suk.
Ki nongkyrshan ki la kyntu ïa ka bor synshar ban pyrkhat biang ïa katei ka mukotduma katkum ki jingjia ha ka saiñ pyrthei kiba dang shen.
Ki pulit kim pat pynmih kano kano ka jingpynbna kaba thymmai halor ka jingdawa ban pyllait noh ïa ki ne ai jingtip ei ei kaba thymmai halor ka jingpynlong ïa ka jingtohkit.
