Imphal, Naitung:
Ki pulit bad ki bor pahara jong ka Manipur ki la pynlong ïa ki jingkhynra kiba bun ha kylleng ka jylla ha ka 25 tarik u Naitung, ha kaba ki la kem ïa saw ngut ki lehnoh kiba ïadei bad ki kynhun lehnoh ba la shah ñiew beaiñ, ki la lap ïa ki jingdih buaid kiba la suba ba ki dei ki drok, bad ki la kurup ïa ki tiar ïaleh, ki tiar siat bad ki tiar pynbthei.
Uwei u dkhot ba trei shitom jong ka KCP (City Meitei), u ba la tip kyrteng kum u Urikhinbam Malemnganba Singh ba la tip ruh da ka kyrteng kum u Watemba (30) uba shong basah ha Sorok Atingbi Khunou ha Jiribam District, u la shah kem na Thongju Part-II kaba hap hapoh jong ka Singjamei Police Station.
Ha ka jingkhynra kaba kyrpang, ki pulit ka Manipur ki la ïoh ban kem sa uwei pat u lehnoh KCP (City Meitei) uba la tip kyrteng kum u Yaikhom Abhinash Meetei ba la tip ruh da ka kyrteng kum u Naoba bad kum u Abi (26) na Kongpal Khongkham Leikai kaba hap hapoh Porompat Police Station ha Imphal East district.
Ki bor pahara ki la lap ruh ïa ka jaka buh tiar iïleh bad ki tiar pynbthei ha ka por ba ki talasi hapoh bad sawdong ka shnong Shangkai bad Mongkot Chepu kaba hap hapoh ka Litan Police Station ha Ukhrul distrik.
Ki tiar ba la ïoh kurup ki kynthup ïa ka suloi pompi ba la shna ha ka thaiñ, ka suloi 12-bore, khyndai tylli ki kuli bym pat pyndonkam jong ki jingsiat bapher bapher, bad ki kuli ba la shna hi ha la ïing bad ka tiar pynbthei (IED).
Ha kawei pat ka jingkhynra, ki bor pahara ki la leit ban khynra ïa ka Highway Auto Care Workshop kaba don ha Patsoi Lamkhai kaba don ha shilynter ka National Highway-37 bad ki la ïoh ban kurup haduh 30 tylli ki sop sabon kiba don 346 gram u drok brown subar na kawei ka kali Pajero (registration number MN07D-3481) kaba ïeng ha katei ka jaka. Ki para trai jong katei ka Workshop ki la shah kem ha kaba ïadei bad katei ka jingkurup ïa katei ka jaka, u Sheikh Salauddin (46) uba shong ba sah ha Odisha bad u Chongtham Anilkumar Singh (38) na Patsoi Part-IV.
Ha kajuh ka por, ki pulit ka Manipur ki la kem ïa arngut ki dkhot jong ka UNLF (P) na Thoubal Bazar halor ka jingkynnoh ba ki donkti ban pynrung dkhot thymmai sha katei ka kynhun. Kine ki riew shimet kiba la shah kem ki dei kiba la tip kyrteng kum u Mutum Seitaraj Singh ba la tip ruh da ka kyrteng kum u Samlang (31) bad u Thounaojam Rakesh Meitei ba la tip da ka kyrteng kum u Amuba bad kum u Pangeingakpa (35). La ïoh ban kurup ruh ïa kawei ka kali Maruti Suzuki Swift na ka kti jong ki.
Ki pulit ki la ïathuh ba ka jingtohkit kaba bniah ka dang ïaid shakhmat ha baroh ki jingjia.
