Shillong, Naitung 26
Ka Sunrays Secondary School bad ka Synod Higher Secondary School ki la khur ïa ka nam lahduh ha ka 32nd State Level Inter School Karate Tournament 2026 ba la pynïaid da ka All Meghalaya Karate-Do Association (AMKA), kaba la poi sha kaba kut ha ka sngi Saitjaiñ ha Multipurpose Indoor Hall jong ka SAI Training Centre, Shillong.
Ka jingioh pdiang ka Sunrays ïa katei ka nam ka dei ha ka kyrdan ïalehkai ki khynnah shynrang bad ïa ka kyrdan ba-ar la ïoh da ka St. Anthony’s HSS. Katba ha ka liang ki kynthei la rah da Synod HSS bad ba-ar ka Sacred Heart Girls HSS.
Ïa ka nam Best Karateka ha ka kyrdan Junior la ïoh da u Daaron R Warjri na ka Christian Academy HSS bad ka Emma T Kharwansuk na ka Stonyland Secondary School. Katba ïa ka nam Best Karateka ha ka Senior la ïoh da u Pusaimi I Kyndiah na ka Loompyrdi Iongpiah UPS, Jowai bad ka Asenka Beryl Marweiñ na ka St. Joseph’s HSS.
Ïa ki khusnam sha kitei ki kynhun lem bad sha ki khynnah la sam da u Addl. Superintendent of Police ka East Khasi Hills Bah Bah Ivan Benson Diengdoh kum u kongsan bad u Bah Alan Niangti, President ka West Jaiñtia District Karate Association ha ka jingïadon lang ki nongïalam ka AMKA ba kiwei kiwei.
Lah ban kdew ki don haduh 802 ngut ki khynnah kynthei bad shynrang kiba la wan shim bynta na ki 126 tylli ki skul kiba la wan na kylleng ki district jong ka Jylla.
