Nongstoiñ, Naitung 25
Ka All Lyngngam Organisation hapoh ka jingïalam u Dr. Bostick Mawsor kum u President ha ka janmiet jong ka sngi Saitjaiñ ka la pdiang burom ïa u heprit Donald Marthong uba la wan poi ha sor Nongstoiñ hadien ba u la ïoh ban leit mihkhmat ïa ka ri India shabar ri lyngba ka jingïalehkai phutbol ha kaba ka kynhun jong utei u heprit ka la rah ruh haduh 2 tylli ki nam lahduh na kitei ki lympung jingïalehkai kiba heh.
Katei ka seng da ka jingkmen ka la ap lypa ha sor Nongstoiñ bad mar sien hiar utei u heprit ka la pynkup burom da ka jaiñ ryngkat u syntiew, u kpieng bad ha kajuh ka por ka seng ka la ïoh ban ïa pajut kti bad utei u heprit da ka song pisa bad la ong ba katei ka jingleh jong ka seng ka long kum ka dak ka ban ai mynsiem ïa ki heprit ka thaiñ khnang ba kin nangshlur shuh shuh ban minot ha ki jingïalehkai bapher bapher.
Na ka liang u President u la ong ba ka la long ka jingsngew sarong ïa ka thaiñ namar wat haba utei u heprit u dei uba na ka shnong Risiang kaba long ka shnong nongkyndong na ka thaiñ Maweit, West Khasi Hills District, hynrei kaei kaba utei u heprit u la leh ka la wanrah ïa ka burom ïa ka shnong ïa ka thaiñ ïa ka jylla bad ïa ka ri India hi baroh kawei, kumta ka seng kam lah khlem da wan ban pliang burom ïa utei u heprit uba dei hok ban ïoh ïa ka jingpdiang burom.
Lah ban kdew hangne ba ka Minerva Academy FC kaba na ka jylla Punjab naduh ka 6 tarik u Naitung 2026 ka la leit ban ïashim bynta sha Finland bad ka rah shi syndon ïa ka nam lahduh ïa kawei ka lympung kaba la tip kum ka Helsinki Cup of Finland, ym tang katta hynrei katei ka shlem ai jinghkai jong katei ka klob kaba kynthup ïa u Mekhamkhraw Nongrem na Mairang bad u Donald Marthong na Risiang, kiba na ka jylla Meghalaya ki la jop ruh sa ïa kawei pat ka lympung kaba la tip kum ka Gothia Cup (Youth World Cup) ha Sweden ha kaba ha katei ka lympung ruh ki la rah ïa ka nam lahduh kiba dei ruh ki lympung kiba heh duh ha kitei ki baroh 2 tylli ki Ri.
