Shillong, Naitung 26
Ka Langsning ka la khur ïa ka jingjop ha kaba sdang ïa ka lympung ïalehkai Shillong Premier League 2026, hadien ba kane ka lahduh jong ka aïom ba la lah, ka la lah ban pynliem noh ïa ka Sawmer da 1-0 kol ha ka sngi Saitjaiñ ha SSA Stadium, Polo.
Kane ka nam jop ka la wan urlong lyngba u Kyrmenskhem Mukhim, uba la ïoh ban thep ha ka minit kaba 81.
Kane ka lympung ïalehkai SPL ka dei kaba khatduh ha kaba ka la lah ban pynlong ha kane ka nongbah, ha kaba la wan sakhi da ki paidbah nongkyrshan jong kine ki kynhun. La sakhi lang da ka jingdon lang ki nongïalam ka Shillong Sports Association, kiba la ai khublei kitbok ïa baroh ar ki kynhun hashwa ban sdang ka jingïalehkai.
Kumba ka paw ka Langsning ka la pynkhreh bha hashwa ba kan shim bynta ruh ha ka Durand Cup 2026, hynrei kumba ka paw na kane ka jingïakhun ka pyni ba kane ka kynhun ka don ïa ki rangïalehkai kiba dangthymmai bad ki dangdonkam ïa ka por ba kin long kiba skhem.
Kane ka kynhun ka don ïa u rangïalehkai shakhmat u Syed Ahmed uba don ïa ka rynïeng kaba jrong, hynrei um shym la lah ban pynurlong ha ka kylla step. Ka kabu ksiar kaba u la ïoh ka dei ha ka minit kaba 69 hadien ba u Kyrmen u la ïoh ban shut ïa ka bol, hynrei um shym la lah ban pynurlong. U Samuel L Kynshi u la ïoh ïa ka kabu kaba biang hashwa ban kut ka jingïalehkai jong ka kylla step, hynrei um shym la lah ban thep. U la ïoh biang sa ar tylli ki kabu ksiar, hynrei u la shah khanglad noh ha ki rangïalehkai ‘dien ka liang pyrshah.
Baroh ar ngut ki rangapkol ki la pyrshang ban ïalehkai bha, ha kaba u Rajat Paul Lyngdoh jong ka Langsning u la lah ban pyllait na ka jingpyrshang u rangïalehkai ka Sawmer u Raikutshisha Buam ha ka minit kaba 38. Kumjuh u rangapkol ka Sawmer u Pyrshangbanbha Dkhar u la ïoh katto katne ki bol ban pyllait ka jingshah thep.
Ha ka kylla miet, ka Sawmer ka la ïoh ar tylli ki free-kick, hynrei kine baroh ar tylli ki la shu long lehnohei. Kane ka kynhun ka la shah thep kol lyngba u Kyrmen. Kane ka la wan hadien ba u Samuel Phawa u la ïarap ban pynbuh bol bad u Kyrmen, um shym la pynlehnohei ïa kane ka kabu ksiar bad u Pyrshangbanbha um shym la lah ban ban pyllait na ka jingshah thep.
Ka jingïalehkai mynta ka lah sngi U Blei kanb long hapdeng ka Nongkseh pyrshah ïa ka Mylliem ha ka por 6 baje janmiet. Kane ka long ka sien kaba ar ïa ka Mylliem ban ïakhun ha ka SPL bad ha ka aïom ba la lah ka la lait thaw da ka said na ka jingshah pynhiar kyrdan bad mynta ka aïom kan hap ban tynjuh bor nyngkong bad ka Nong-kseh, kaba la bat ïa ka nam lahduh ha ka First Division bad ruh ha ka Champions Cup jong ka aïom ba la lah bad ruh ha ka Meghalaya State League 2026.
