Guwahati, Naitung:
Shi bynta ban shim ïa ka sienjam kaba kongsan sha ka jingkylla ha ka bording kaba don jingkyrmen bad ka jingpynroi ïa ki karkhana kiba ïadei bad ka kad liengsuiñ, ka jingthmu ban seng ïa ka E-Methanol Plant ha kaba ka la don ka jingïasoi kaba kyrpang.
Ka Assam Petro-Chemicals Limited (APL) kaba dei ka karkhana jong ka sorkar Assam, ka la ïasoi ïa ka soskular (MoU) bad ka Deendayal Port Authority, Kandla, Gujarat. Kane ka projek kan ïohi ïa ka jingbei tyngka kaba palat T.1,200 klur bad la khmih lynti ba kan pynmih haduh 3,500 tylli ki lad kamai hala ki rukom rukom.
Ïa kane ka MoU la dep ban ïasoi ha kine ki bnai ba la lah ha ka jingïadonlang u Myntri Rangbah ka jylla Assam u Himanta Biswa Sarma bad u Myntri ka sorkar pdeng jong ka tnat Ports, Shipping and Waterways u Sarbananda Sonowal ha ka jingïalang kaba la long ha Chief Minister’s Secretariat ha Dibrugarh. Ka karkhana E-Methanol ba la tyrwa kan pynleit jingmut ha kaba pynmih ïa ka umphniang Green Methanol, ka umphniang kaba duna ka carbon kaba la nang kham shim kum ka lad kaba lah ban treikam na ka bynta ka jingkit lieng ha duriaw bad ki jingpyndonkam ha ki karkhana.
Ki heh sorkar ki la ong ba kane ka projek ka ïahap bad ka jingkular jong ka ri India ban pynduh ïa ka lyer jakhlia, ki umphniang kiba khuid, bad ka jingpynroi kaba neh ba la ïalam da ki kad liengsuiñ, katba ka plie lad thymmai na ka bynta ka jingroi jong ki karkhana ha Assam.
