Shillong, Naitung 27
Ka Meghalaya Wushu Association (MWA) ka la pynkut noh ïa ka 23rd Meghalaya State-Level Wushu Championship 2026 ha ka sngi Saitjaiñ, ha kaba ka East Khasi Hills District ka la long ka lahduh.
Ïa kane ka lympung ïalehkai kaba ar sngi kynthih la pynlong ha Rajeev Wushu Hall, Assam Regimental Centre (ARC), Happy Valley, Shillong ha kaba la wan shim bynta da kumba 300 ngut ki nongshim bynta kiba na kylleng ki district jong ka Jylla. Kane ka lympung ka long shi bynta ban pyni ïa ki sap ïalehkai ba kyrpang bad ban don ïa ka mynsiem ïalehkai khnang ba kin long kiba paw ha lawei ka ban wan.
Ha Kane ka lympung ka East Khasi Hills District kaba la bat ïa ka nam lahduh ka la khur 300 poiñ. Ka West Jaiñtia Hills ka la wan ba-ar ha kaba ka la khur 180 poiñ bad ïa ka kyrdan balai la khur da ka East Jaiñtia Hills kaba la ïoh 100 poiñ.
Ha katei ka sngi pynkut la ïadonlang u Vice President ka Meghalaya State Olympic Association (MSOA) u Bah Ian Lyngdoh kum u kongsan, ha ryngkat ka jingïadon lang u Lieutenant Colonel Gangte, Officer In-Charge ka Assam Regimental Centre (ARC) Wushu Node bad ka Boys Sports Company kum u symbud kongsan, kumjuh u Bah Donny R. Ranee, President ka MWA, Bah Jerry F. Wankhar, General Secretary bad kiwei kiwei.
Lah ban kdew ba kane ka jingpynlong ka MWA ïa kane ka lympung ka long shi bynta ban jied ïa ki nongïalehkai na ka bynta ka 39th National Games 2027 ha kaba ïa kane ka jingïalehkai la tyrwa ban pynlong Arunachal Pradesh.
Te kumta lyngba ka jinglah ban ïalehkai bha, kito ki nongïalehkai kiba la shah jied kin ïoh ka jingshah hikai lem bad ki nongleit shim bynta shabar khnang ba ki la lah ban wanrah nam bad burom ïa ka Jylla ha katei ka lympung kaba heh jong ka ri.
