Shillong, Naitung 27
Ka Nongkseh ka la khur ïa ka jingjop kaba nyngkong ha ka Shillong Premier League, hadien ba ka la lah ban pynliem noh ïa ka Mylliem da 1-0 kol ha ka lah sngi U Blei ha SSA Stadium, Polo.
Kane ka nam jop ka la wan urlong lyngba u Aibiangmame Nongneng uba la thep ha ka minit kab 45’+5 jong ka kylla step na ka bynta ban khur ïa ki lai poiñ.
U G. Marweiñ (rephri) u la hap ban sei card ha bun ki khep, ha kaba katto katne ngut ki nongïalehkai ki la ïoh jingsneng bad mar uwei na ki rangïalehkai ki la shah buh noh na madan hashwa ban kut ka por ïalehkai.
Ka Mylliem ka la long ka kynhun kaba la ïada tyngeh ha ka kylla step. Kane ka kynhun ka la pyrshah ban ïakhun tyngeh pyrshah ïa ka Nongkseh lyngba u Remark Kharmalki bad u rangïalehkai ba dangshu dep soi thymmai u Kevizakie Ciesotsu hynrei kim shym la lah ban pynurlong.
Hapdeng kane ka jingïakhun ka Nongkseh ka la ïoh ban pynkhih jar lyngba u Aibiang bad haduh kaba kut jong ka kylla step kane ka lahduh jong ka Meghalaya State League ka dangtam da 1-0 kol.
Hadien ba la la bteng ïa ka jingïakhun jong ka kylla miet, ki rangïalehkai ka Mylliem ki la pyrshang ban ïakhun tyngeh, hynrei kane ka kynhun ka la sdang ban hiar arsut hadien ka jingshah beh noh u Shaibor Nongrum na ka daw ka jingïohpdiang da ar tylli ki yellow card. Hynrei tang hadien katto katne por u Arlangky Nongsiej jong ka Nongkseh u la shah beh noh na madan na ka daw ka jingïohpdiang da ar tylli ki yellow card.
Hadien katto katne por ka Nongkseh ka la bteng ban ïakhun tyngeh na ka bynta ban buh jingeh ïa ka Mylliem, hynrei u rangapkol u Rihoklang Khongjoh u lah ban ïalehkai bha na ka bynta ban khanglad ïa ki jingpyrshang u Hardy Cliff Nongbri bad u Sheen Sohktung.
Ka jingïalehkai ha ka sngi Ba-ar kan long hapdeng ka Rangdajied United pyrshah ïa ka Meghalaya Police ha ka por 6:30 janmiet.
