Khliehriat, Naitung 28
Ka Sein Khynroo Umsatai ka la pynjemkhnap haduh 5-0 kol ïa ka Umrasong SCC na ka bynta ban khur jingjop ha ka lympung ïalehkai 3rd Division Football Tournament ba la pynïaid da ka East Jaiñtia Hills District Football Association (EJHDFA) ha ka sngi Ba-ar ha madan artificial turf Diengshynrum, Khliehriat.
U Kephas Rymbai bad u Jewell Sympli ki la ïoh ban thep mar ar kol na ka bynta ban pynlong ïa kane ka kynhun ban khur ïa ki lai poiñ.
Kumba ka paw na kane ka jingïakhun ki rangïalehkai ka Sein Khynroo Umsatai ka la lah ban ïalehkai bha naduh kaba sdang ha kaba ka la ïoh ban thep kol nyngkong ha ka minit kaba 13 lyngba u Kephas. Hadien shiteng kynta une u rangïalehkai u la thep biang ïa ka kol kaba ar jong u ha ka minit kaba 31 bad ïa ka kol kaba lai la thep da u Dameshwa Pyrtuh (35) na ka bynta ban tam 3-0 kol ha ka kylla step.
Hadien katto katne por ba la bteng ïa ka jingïakhun jong ka kylla miet ka Sein Khynroo ka la ïoh ban thep biang sa ar kol lyngba u Jewell ha ka minit kaba 52 & 64. Haduh kaba kut ka Umrasong kam shym la lah ban pynphai bad ka la mad ïa ka jingshah rem.
Haba phai sha kawei pat ka jingïalehkai kaba la long kham hashwa hapdeng ka Wapung SSWO bad Borghat SCSC ki la kut ha ka jingïakhaid khlem da lah ban thep kol.
Katba ka Evergreen SC Ladwapung bad Pala SC ki la ïakhaid mar 2-2 kol. Ïa ki kol jong ka Evergreen SC Lad Wahwapung la thep da u Satisformi Lamo ha ka minit kaba 3 bad u Jomiki Dkhar ha ka minit 27, katba ïa ki kol jong ka Pala la thep da u Ebiangmi Paslein (15) bad Famous Paslein (22).
