Shillong, Naitung 28
Ka India ka la lah ban pynpaw ïa ka jingtbit ha ka sngi kaba san jong ka Commonwealth Games ha kaba ka Sharmila Dhankar ka la khur ïa ka takma ksiar, katba u Sarvesh Kushare, Valluri Ajaya Babu bad ka Gyaneshwari Yadav ki la khur ïa ka takma rupa, katba ka Shilpa K. Shyla bad ka Bindyarani Devi ki la khur ïa ki takma rnong.
Lyngba kine ki hynriew tylli ki takma, ka la pynlong ïa ka India ban kynjoh sha ki 10 tylli na ka bynta ban don ha ka kyrdan ba phra.
Katei ka nongïalehkai kaba la 40 snem ka rta ka la ïashim bynta ha ka Shot Put F57 ha ka liang ki kynthei bad ka la lah ban kawang haduh 9.81 mitar ha Scotstoun Stadium.
Kumba ka paw ka Athletics, para-athletics bad ka weightlifting ka la nangkiew shaphrang ha kane ka lympung haduh mynta, katba ki nongïakura ruh ki la don jingkyrmen ban khur takma hadien ba ki la jam sha ka quarter final.
Haduh mynta ka Australia ka dangbteng ban lamkhmat ha kane ka lympung ha kaba la la khur 59 tylli ki takma (26 ksiar, 13 rupa bad 20 rnong), katba ka England ka la ïai sah ha ka kyrdan ba-ar bad 32 tylli ki takma.
Ka Canada ka la ïoh ban bat ïa ka kyrdan balai bad 21 tylli ki takma, ïa ki kyrdan babud la bat da ka Nigeria (10) bad ka Scotland (11). Ka South Africa bad ka Malaysia ki la khur mar 11 tylli ki takma bad ka India ka la khur 10 tylli.
