Shillong, Naitung 28
Ka All India Football Federation (AIFF) ka la pynbna ba kan sdang noh ïa ka lympung ïalehkai Indian Foot-ball League (IFL) 2026-27 naduh 16 tarik u Risaw mynta u snem, ïa kane ka rai la shim ha ka jingïalang jong kane ka synjuk ha ka lah sngi U Blei ha Football House kaba ha New Delhi.
Ha kane ka jingïa-lang la ïadon lang ki nongmihkhmat na ki 10 tylli napdeng ki 11 ki klob kiba kynthup ïa ka Aizawl FC, FC Bengaluru United, Chanmari FC, Delhi FC, Dempo SC, Gokulam Kerala FC, Rajasthan United FC, Real Kashmir FC, Shillong Lajong FC bad ka Sreenidi Deccan FC. Ka Mohammedan Sporting Club kam shym la wan shim bynta lang watla ka la shah pynhiar kyrdan noh na ka Indian Super League.
Katba na ka liang ki nongïalam ka AIFF kiba la don lang ki long u Deputy Secretary General u M. Satyanarayan, u Akshay Rohatgim Head of Competition bad u Head of Strategy and Operations u Nildeep Mondal.
Kiwei pat ki rai kiba la shim ha katei ka jingïalang ki long ban ailad ban pynïalehkai tang lai ngut ki rangïalehkai nabar ri ha kawei pat kawei ka kynhun ha kane ka aiom ka ban wan.
Kum shim bynta ban pynkhlaiñ ha ka youth development, ki klob IFL ki la mynjur ruh ba kin pynrung hapoh ka AIFF Academy Accreditation Programme bad ban ïoh ïa ka jingithuh kaba duna eh ar ngut ki khlur ïalehkai ha u snem 2030.
U Deputy Secretary General jong ka AIFF u M. Satyanarayan u la ong, “Kane ka dei ka jingïalang kaba nyngkong eh jong ngi shwa ban sdang ka samoi ïalehkai kaba thymmai, bad ngi la sdang da kaba bishar bniah ïa ka jingïalehkai. Na ka liang ki klob ki la sngewhun ba ngin pynlong ïa kane ka lympung ha ryngkat ka jingpynlut kaba duna.”
