Shillong, Naitung 28
Ka Meghalaya Police F.T kaba la wanphai sha ka Shillong Premier League hadien phra snem, ka la lah ban pynïakhaid mar 1-1 kol pyrshah ïa ka Rangdajied United FC ha ka sngi Ba-ar ha SSA Stadium, Polo.
Kane ka la wan lyngba u Pynshailang L Lyngkhoi (53′) hadien ba ka Rangdajied ka la pynkhih jar nyngkong lyngba u Dameki Khongstia (20′).
Ka MLP kaba la ju don borabor ha kane ka lympung ïalehkai, hynrei ka la shah pynhiar kyrdan noh ha kaba kut jong u 2018. Te kumta ka la wanphai biang sha ka SPL hadien ba ka la wan ba-ar ha ka First Division 2025.
Kane ka kynhun ka la pynneh tang da kijuh ki rangïalehkai, hynrei ka la wanrah da u Bah Dius Lapasam ban shimti kum u coach uba thymmai.
Kumba ka paw ka RUFC kaba la wan ba san ha ka aïom ba la lah, kam shym la lah ban ïalehkai bha ha ka Meghalaya State League. Ka Rangdajied ka la ïoh ïa ka kabu kaba biang ban pynkhih jar na ka daw ka jingbym lah ban teh lakam da ki rangïaleh-kai ka MLP. Kane la wan hadien ba u rangapkol u Eveningstar Bareh um shym la don ha ka liang ban pyllait na ka jingshah thep bad kane ka la pynlong ïa u Dameki ban pynkhih jar.
Hadien katto katne por ka MLP ka la pyrshang ban ïakhun tyngeh, hynrei u Marbiangki Suchiang um shym la lah ban pynurlong ha kaba ka bol kaba u la shut ka la leit dei na diengkol.
Ha ka kylla miet ka MLP ka la lah ban pynurlong lyngba u Pynshailang ha kaba u rangapkol ka RUFC u Meshan Banjop Sumer um shym la lah ban khanglad na ka jingshah thep. Kumba ka paw u Pynshailang u la long u rangthep kol ba kynsai ha ka First Division jong u snem ba la lah.
Watla kine ki kynhun ki la ïoh ïa ki katto katne ki kabu kiba biang, hynrei haduh kaba kut kim shym la lah ban pynurlong bad ki la ïakhaid mar shi kol.
Ka jingïalehkai mynta ka sngi Balang kan long hapdeng ka Shillong Lajong pyrshah ïa ka Nangkiew Irat ha ka por 4 baje nohphai sngi. Ka Lajong ka la wan ha ka kyrdan ba-ar ha ka SPL 2025, katba ka Nangkiew Irat ka la wan ha ka kurdan basaw.
