Shillong, Naitung 28
Kan dei ka sien kaba nyngkong eh ba u rangïa -lehkai phutbol ka Jylla u Embok -lang Nongkhlaw u la soi ïa ka kontrak bad ka Al Rams Club, kaba long ka klob Second Division na United Arab Emirates.
Une u rangïalehkai sha-khmat ba dang 21 snem ka rta, u long uba don sap naduh ba u dangkhynnah bad u la ïasoh sha ka Al Rams hadien ba u la mih noh na ka Sreenidi Deccan FC. U Emboklang u la ïoh ban ïalehkai hynñiew sien ha ka Indian Football League ha ka aïom ïalehkai 2024-25 bad ha u 2025-26 um shym la ïoh ban ïalehkai.
Lah ban kdew ba u la ïalehkai ruh na ka Malki ha ka Shillong Premier League 2022. Hynrei ka kam ïalehkai jong u ka la paw hadien ba u la don ha ka thup jong ka kynhun ïalehkai U-16 jong ka ri India bad u la ïoh ban ïalehkai ha ka jingïalehkai paralok pyrshah ïa ka UAE ha u snem 2021.
Kane ka jingtbit ka jong u ha ka kam ïalehkai ka la pynlong ban shah jied ha ka Tata Trusts na ka bynta ban ïoh rung hapoh ka Centre of Excellence na ka bynta ka phutbol ha Aizawl ha kaba u la shah jied u coach ka kynhun ïalehkai U-16 ka ri u Bibiano Fernandes.
Ha ka aïom ïalehkai 2019, u Embok u la long u rangthep kol ba kynsai ha ka Mizoram U-15 League. Hashwa ba un ïoh rung hapoh ka Centre of Excellence, u Emboklang u la ïalehkai ha ki katto katne ki klob ka nongbah kum ka Royal Wahingdoh bad ka Shillong Lajong. U la ïoh ruh ban mihkhmat ïa ka Jylla ha ka Sub-Junior National Championship 2017 bad u la ïalehkai ruh na ka H. Elias Higher Secondary School ha ka Subroto Cup jong u snem 2018. Ha ka aïom ïalehkai 2020-21 u la ïasoh sha ka Bengaluru FC, kaba la khur jingjop ha ka Reliance Foundation Development League ha u 2022.
