Guwahati, Naitung:
Shisngi hadien ba la don ka jingbthei kaba jur bha kaba la pynpra ïa kawei ka karkhana shna nar ha Cachar distrik jong ka Assam, ki pulit ki la kem ïa san ngut ki briew, kynthup ïa u trai jong kane ka karkhana, katba ka jingtohkit halor katei ka jingjia, ka nang kiew stet.
Kane ka jingbthei bom, ka la jia ha ka step jong ka sngi U Blei, ha kane ka karkhana ha Cachar, ha kaba saw ngut ki nongtrei ki la ïap bad arngut kiwei pat ki la mynsaw. Ki pulit, ki ïathuh ba saw ngut ki dkhot jong ki bor pynïaid jong kane ka karkhana, ki la shah kem na Cachar, katba ïa u trai, la lap sha Guwahati bad la kem ïa ki, ha ka lah sngi U Blei.
Ïa kine kiba shah kynnoh la pynngat hapoh ki kyndon ba ïadei jong ka Bharatiya Nyaya Sanhita (BNS), kynthup ïa ki jingshah kynnoh kiba ïadei bad ka jingkynnoh ba ki leh khlem akor. Hadien la rah ïa ki hakhmat ka ïingbishar jong ka thaiñ.
Katkum ka jingong jong ki nongtohkit, katei ka jingbthei ka la jia katba dang ïaid ka jingtrei hapoh kane ka karkhana. La ngeit ba ka nar kaba la um ka la bthei ha ka por ba jia katei ka jingjia, kaba la tap lut ïa ki nongtrei kiba don hajan. Saw ngut ki nongtrei ki la khlad noh ha katei ka jaka, katba ki arngut ki nongtrei kiba la mynsaw ki dang don hapoh ka jingshah sumar.
Kane ka jingjia ka la pynmih ïa ki jingïakhih shabar jong ka karkhana, ha kaba ki nongshong shnong ki la kynnoh ba ka jingsngewkhia halor ka jingshngaiñ ha katei ka karkhana kam don shuh la katto katne por. Ki la dawa ban leh da kaba tyngeh ïa kiba donkti bad ki la khot ruh ban tohkit bniah ïa ki jingjia kiba la pynlong ïa katei ka jingbthei.
U Myntri ka jylla u Kaushik Rai u la leit jngoh ïa katei ka karkhana hadien katei ka jingjia bad u la ïathuh ba la hukum ban pynlong ïa ka jingtohkit Majisterial. La bthah ruh ïa ka tnad treikam jong ka distrik ban bishar bniah la ka karkhana ka treikam katkum ki kyndon ba la buh ban ïada na ki jingma.
