Shillong, Naitung 28
Ki samla na Mawsiatkhnam sa shisien ki la shongshit biang hadien ba u MLA barim Bah P.T Sawkmie u la aiti da ki jersey bad kiwei ki tiar ïalehkai na ka bynta ka Inter Dong Football Tournament kaba ki thmu ban pynlong ha kine ki sngi ban wan.
Haba ai jingkren ha ka jingïalang balyngkot u Bah Sawkmie u la pynpaw ba u angnud ba ka Mawsiatkhnam kan ïashim bynta ha ka 4th Division jong ka Shillong Sports Association ban ïalehkai ha Polo.
Ïa kaba u la pynpaw ba lada u wanphai biang ha ka bor kum u MLA ka thaiñ kan ym don jingeh ïa ka Mawsiatkhnam ba kan ïashim bynta, namar un long la la kloi ban mang pisa na ka bynta jong ka.
Ha kane ka sngi la ïoh ruh ïa ka jingkren na u Rangbah Shnong Mawsiatkhnam Bah T. S. Wahlang, uba la pynpaw ba ha kine ki sngi ki la kynjah shisha ki jingïalehkai phutbol naduh bym long nongmihkhmat shuh u Bah P.T Sawkmie.
“Ngim ju ïohsngew shuh ïa ki jingput ki rephri ha ka jingïalehkai, kaba ju pynshongshit ïa ki khun samla ba kin lait na ki jingmlien basniew,” la ong u Bah Wahlang.
La ïoh ruh ïa ka jingkren na ki nongïalam ka Sports Club, u samla B. Pyngrope bad samla H. L Mawphlang, kiba la ai khublei bad pynpaw ïa ka jingsngewnguh jong ki ïa u Bah P.T Sawkmie halor kane ka jingnoh synñiang ka jong u.
