Shillong, Naitung 29
Ka India ka la nangjam shaphrang ha ka sngi kaba hynñiew jong ka lympung ïalehkai Commonwealth Games 2026 kaba dangïaid mynta ha Glasgow ha u Gulveer Singh bad ka Harjinder Kaur ki la khur ïa ki takma rupa bad ka la thikna ruh ban khur sa lai tylli ki takma na ka jingïalehkai ïakura ne boxing.
U Gulveer u la lah ban pynlong ban long uba nyngkong na India ban khur takma ha ka Commonwealth Games ha ka jingïakop mareh 10,000m jong ki shynrang hadien ba u la lah ban khur ïa ka takma rupa. Katba ka Harjinder ka la ïai bteng ban pynpaw ïa ka jingtbit ha ka jingïakop rah nar ne weightlifting da kaba ka la lah ban kyntiew na ka takma rnong kaba ka la khur ha Birmingham ha u snem 2022 sha ka takma rupa ha ka kyrdan ïakop kaba 69kg jong ki kynthei.
Kane ka sngi ka la nangai jingkmen ïa ka India ban khur takma lyngba ki nongïakura ha kaba u Jadumani Singh, Preeti Pawar bad ka Priya Ghanghas ki la jam sha ka semi final na ka bynta ban nangkyntiew ha ka jingïoh takma. Katba u Vishal TK u la jam sha ka semi final ha ka 400m jong ki shynrang, hynrei u Srihari Nataraj u la duh da ka said ban rung sha ka final ha ka jingïakop jngi (swimming). Ka India ka la don jingkyrmen ruh ban khur takma sa na ki nongïalehkai kiba duna dkhot met ha ka para swimming, athletics bad lawn bowls.
Kumba ka paw ha ka sngi kaba hynriew, ka India ka la khur 12 tylli ki takma. Kine ki long ar tylli ki takma ksiar, hynñiew ki takma rupa lem bad lai tylli ki takma rnong.
Hynrei ha kane ka sngi kaba hynñiew, ka India ka dangdon jingkyrmen ban khur takma kynthup ïa ka Sanjana ha ka weightlifting, u Sreeshankar Murali ha ka long jump, ka Parul Choudhary ha ka 3000m steeplechase. Ki la don bun ki nongïakura kiba la rung sha ka quarter final, kumjuh ha ka swimming, para sports bad lawn bowls.
