Shillong, Naitung 29
Ka ‘thei ïakura ka ri India ka Arundhati Choudhary ka la lah ban pynliem ïa ka nongïalehkai ka liang pyrshah jong ka na ka bynta ban pynthikna ban ïoh takma ha ka Commonwealth Games 2026, ha kaba ka la pynpaw ïa ka jingeh kaba khraw jong ka hashwa ba kan kiew ha ka rynsan ïalehkai.
Kane ka ‘thei ïakura kaba la rung sha ka semi final jong ki kynthei ha ka kyrdan jingkhia kaba 70kg da kaba pynliem ïa ka Morgan Henderson na New Zealand, ka la pynpaw ba ka la hap ban pynduna ïa ka jingkhia kumba 2 kilo tang ha ka shisngi hadien ba khlem da khmih lynti ba ka la pynkiew ïa ka jingkhia hashwa ban sdang kane ka lympung ïalehkai.
Haba pynpaw hadien ka jingjop ha ka jingïalehkai quarter final, ka Arundhati ka la kubur ba ka jingpynduna ïa ka jingkhia ka la buh jingeh bha ïa ka ha ka bor met bad bor pyrkhat.
“Nga kiew ka jingkhia na ki katto katne ki daw, hynrei nga la lah ban pynhiar 2 kilo hynnin ka sngi na ka bynta ban pynneh biang ïa ka jingkhia ka jong nga. Ka long kaba eh bha haduh katta katta,” la bynrap ka Arundhati.
Wat hapdeng kane ka jingdawa ban pynduna ïa ka jingkhia, hynrei kane ka ‘thei ïakura jong ka ri ka la lah ban jam sha ka semi final bad ka la pynthikna ïa ka India ban khur lypa ïa ka takma rnong lada jia ba ka shah rem.
Ka Arundhati ka la aiti ïa kane ka jingjop jong ka sha u para jong ka bad ka ïing ka sem jong ka, da kaba pdiang ïa ka jingkyrshan ba man ka por jong ki ha ka jingïaid lynti jong ka ha ka kam ïalehkai.
“Nga kwah ban aiti ïa kane ka jingjop sha u para jong nga bad sha ka ïing ka sem jong nga, ka khubor jong nga sha ki samla jong ka India ka long ba ka dei ka jingkyrkhu jong phi baroh ba nga la don hangne mynta ka sngi.”
Ka Arundhati ka la ïoh ban rung sha ka semi final hadien ba ka la lah ban pynliem ïa ka Morgan Henderson na New Zealand da 3-1 lyngba ka ‘split decision’ ha ka quarter final 70kg jong ki kynthei. Ha kane ka jingïakhun, katei ka ‘thei ïakura jong ka ri ka la lah ban pyni ïa ka mynsiem ïakhun haduh lai tylli ki wat jingïakhun. Lai ngut ki nongbishar ki la ai jingkyrshan da 30-26 ha ka liang jong ka, katba uwei u nongbishar u la kyrshan ïa ka Henderson da 29-27. U nongbishar uba san u la rai pynïakhaid da 28-28, hynrei ka jingshah khate shi poiñ pyrshah ïa ka nongïakura na New Zealand ha kaba kut la rai jop ïa ka Arundhati.
Nalor ka Arundhati, kiwei pat ki nongïakura kiba la thikna ban khur takma ki long ka Lovlina Borgohain (Women’s 75kg), Preeti Pawar (Wo-men’s 54kg), Priya Ghanghas (Wo-men’s 60kg), Jadumani Singh (Men’s 55kg), Sakshi Choudhary (Women’s 51kg), Arundhati Choudhary (Wo-men’s 70kg) bad u Sachin Siwach (Men’s 60kg).
