Khliehriat, Naitung 29
Ka lymung ïalehkai 3rd Division Football Tournament ba la pynïaid da ka East Jaiñtia Hills District Football Association ka la nangjam shaphrang, ha kaba ka Tuber Shohshrieh SCSC, Tongseng SYSC bad ka Umtyra YWSC ki la khur jingjop ha ka sngi Balang ha madan Diengshynrum, Khliehriat.
Ha ka jingïakhun kaba nyngkong, ka Tuber Shohshrieh ka la pynliem noh ïa ka SWC Deinsatlang da 3-2 kol.
Ïa ki kol jong ka Tuber Shohshrieh la thep da u Franklin Muruh ha ka minit kaba 21, katba ïa kiwei ki ar kol la pynbud da u Shanbok Muruh (45 & 77). Na ka liang ka Deinsatlang ka la pynphai kylla ar kol lyngba u Pynshe Da o Phniaw (58) bad u Shijur Swer (59).
Ha kawei pat ka jingïalehkai kaba bud, ka Tongseng SYSC ka la pynliem da 2-0 kol ïa ka Tpepswer SSWO. Ïa kine la thep da u Banker Suiam ha ka minit kaba 76 bad u Fining Lyngdoh (79).
Ha kawei pat ka jingïalehkai ka Umtyra YWSC ka la pynliem ïa ka Dkhiah East SC da 1-0 kol bad kawei ka la wan lyngba u Atiar Lapasam, uba la thep ha ka minit kaba 27.
