Nongstoiñ, Naitung 29
Ka Dorbar Shnong Risiang ha ka sngi Balang ka la pynkup burom ïa u rangïalehkai phutbol u Donald Myrthong uba la wanrah nam bad burom ïa ka ri India hi baroh kawei lyngba ka jingïadon bynta jong ki dangshen bad ka kynhun ïalehkai ka Minerva Academy Football Club kaba la rah ïa ka nam lahduh ha ka Gothia Cup (World Youth Cup).
Ïa katei ka jingïalang pynkup la pynlong ha ka skul Lurmangkara Secon-dary School Risiang ha kaba nalor ki nongïalam shnong, ki la don ruh ki kynhun seng bapher bapher, ki riew shimet bad kumjuh ka kynhun jong ki Coach na Nongstoiñ na ka bynta ban pynkup burom lang ïa utei u heprit.
Nalor ka shnong Risiang, la ïoh ruh ïa ka jingpynkup burom na ki kynhun sengbhalang ba kynthup ïa ka HYC Maw-eit Circle, FKJGP Maweit Circle, Synjuk Synshar shnong Risiang, na ka Lurmangkara Secondary school bad na ki Coach jong ka West Khasi Hills.
Lah ban kdew hangne kumba u heprit Donald na ka Shnong Risiang ha ryngkat u heprit Mekham-khraw Nongrem na Mai-rang, Eastern West Khasi Hills ki la leit ban mih-khnat ïa ka Ri India na ka Minerva Academy FC, Punjab ha kaba kane ka kynhun jong ki ka la khur jingjop ha ki ar tylli ki lympung kata ka Helsinki Cup ha Finland bad ka Gothia Cup ha Sweden.
U Bah Robenker Nong -rum, Coach jong ka Grass -roots Center Nongpyn-deng haba kren ha katei ka jingïalang u la ong ba lymda ki kmie ki kpa kim len lade ka shnong Risiang, ka West Khasi Hills, Jylla bad Ri India kan nym paw.
U la kyntu ruh ïa ki kmie ki kpa ba kin nym khang ïa la ki jong ki khun, hynrei kane ka pyrthei mynta ruh ka jingïalehkai phutbol ruh kalah ban seisoh ha ka jingim ka jong ngi ha kaba mynta bad kaba la shai ruh.
Te kumta u la kyntu ruh ïa iwei pa iwei i heprit ba kin ïalehkai phutbol haduh ban da seisoh ym dei ban ïalehkai tang shiteng por lane tang namar ba ym don ka lad ka lynti sa sangeh noh namar ba ka don beit ka lad haba don ka mon.
U la ai khublei ruh ïa u heprit Donald da kaba u la ong ba un long uba pynmlien ïalade ban long ‘decipline’ la ka long ha ka bam ka dih, ha ki jingmut jingpyrkhat bad ha kino kino ki bynta.
Shuh shuh u la ong ruh ba wat nym sngewhun tang hangne hynrei nangleh khambha, long u ba sngewrit nangtrei shitom shuh shuh namar ka shnong Risiang ka shong ha ki kti jong phi ban kyntiew nam.
“Phi dei ban don ïa ka thong ban mihkhmat ïa ka India ym tang na ka Minerva, hynrei haduh ba phi la heh la san to mihkhmat ïa ka India, phi dei ban kut jingmut triang ban poi sha kliar lum ha kam ïalehkai,” u la bynrap.
