Itanagar, Naitung:
U Myntri ka sorkar pdeng u Kiren Rijiju u la ai khublei ïa u Myntri Rangbah ka jylla Arunachal Pradesh u Pema Khandu uba la pyndep ïa ka 10 snem jong ka jingshakri jong u ha kakam, ha kaba u la ai ka jingïaroh halor ka jinglong nongïalam jong u bad ïa ka jingkiew jong ka jylla ha ki jingtei, ka synshar khadar bad ka imlang sahlang ha kine ki phew snem ba la dep.
U Rijiju u la ïakynduh ïa u Khandu ha Parliament House ha New Delhi bad hadien u la ïasam ïa ki jingtip ba bniah halor ka jingïakynduh ha ka rynsan X.
“La ïakynduh ïa u Myntri Rangbah ka Arunachal Pradesh, u PemaKhandu, ha Parliament House mynta ka sngi. La ai khublei ïa u ba u la pyndep ïa ka 10 snem ka samoi treikam jong u,” la thoh u Rijiju, da kaba bynrap ba ka jylla ka la sakhi ïa ki “mawbah ba kongsan ha ka histori ha ki jingtei, ka imlang sahlang bad ki jingpynkylla ha ka synshar khadar”.
Haba jubab ïa ka khubor jong u Myntri, u Khandu u la ai khublei ïa u Rijiju uba ïai bteng ban kyrshan bad ong ba ïa ka roi ka par jong ka jylla la pynkhih da ka jingïalam jong u Myntri Rangbahduh ka ri u Narendra Modi.
“Khublei shibun, Myntri ka sorkar pdeng ba don burom Kiren Rijiju, na ka bynta ka jingkyrshan bad jingpynïaid ba bteng jong phi,” la thoh u Khandu ha ka rynsan X. U la ong ba ka Arunachal Pradesh ka la sakhi ïa ka “jingkylla kaba phylla ha baroh ki bynta”, da ka “jingroi kaba khlem pat ju jia mynno mynno ruh kaba la poi sha man la ki thliew jong ka jylla”, bad u la pynskhem biang ïa ka sorkar ba kan ai ïa ka jingkular kaba khlaiñ”.
U Khandu, u la shimti ïa ka shuki kum u Myntri Rangbah ka Arunachal Pradesh, ha ka 17 tarik, Naitung, 2016, bad dang shen, u la pyndep shisnem, ha ka jingsynshar ïa ka sorkar jylla.
