Shillong, Naitung 30
Ka Lawsohtun SC ka la jop da 7-0 kol ïa ka Sohïong SC ha ka SSA 2nd Division Football League 2026 bad u Mewan Rasmut u la thep marwei haduh san kol, ha ka sngi Palei ha SSA Stadium, Polo.
Naduh kaba sdang jong kane ka jingïakhun, ki rangïalehkai ka Lawsohtun ki la lah ban pynpaw ïa ka jingtbit ha kaba u Pynshngaiñ Marboh u la pynkhih jar nyng -kong ha ka minit kaba 6. Hadien shiteng kynta une u rangïalehkai shakhmat u la thep biang sa shi kol ha ka minit 38.
Hashwa ban kut ka kylla step ka Lawsohtun ka la thep biang sa ar kol lyngba u Mewan Rasmut ha ka minit kaba 42 & 45 na ka bynta ban 4-0 kol ha ka kylla step.
Hadien ba la bteng ïa ka jingïalehkai jong ka kylla miet u Mewan u la ïoh ban thep biang sa lai kol ha ka minit kaba 82, 88 & 90+3 na ka bynta ban khur syndon ïa ka jingjop.
Haba phai sha kawei pat ka jingïakhun, ka Sohryngkham SC ka la pynliem noh ïa ka Tynring SC da 2-1 kol.
Ka Tynring ka la pynkhih jar tang mar ïasdang ka jingïalehkai lyngba u Marbiang Kharmalki (3), hynrei ka Sohryngkham ka la lah ban pynphai kylla ar kol lyngba u Winstar Kharpran (17) bad u Daïoniki Kharpran (58).
