Shillong, Naitung 30
Ka nongbah Shillong kan sakhi ha ka jingwan biang ka lympung ïalehkai 135th Indian Oil Durand Cup, ha kaba ka Shillong Lajong FC kan pynkhreh ïa ka jingïakhun pyrshah ïa ka Nongkseh SS&CC bad kane kan dei ka jingïalehkai kaba nyngkong jong ka Group-E, mynta ka sngi Thohdieng ha Jawaharlal Nehru Stadium, Polo ha ka por 5 baje janmiet.
Kane ka long ka sien kaba lai ba ka nongbah Shillong kan ïoh pynlong ïa ka Durand Cup, hynrei kan dei pat ka sien kaba nyngkong eh ban sakhi ïa ki lai tylli ki klob ka nongbah ki ban ïakhun ha kane ka lympung ïalehkai kaba la rim ha ka dewbah Asia.
Kumba ka paw ka Shillong Lajong ka la ïoh ban ïashim bynta lai sien ha kane ka lympung bad ha u snem ba la lah ka la rung shaduh ka semi final hashwa ba kan shah rem noh ha ka NorthEast United, kaba la bat ïa nam lahduh. Hynrei kan dei ka sien kaba nyngkong na ka bynta ka Nongkseh bad kumjuh ka Langsning FC.
Ha kaba ïadei bad kane ka jingïakhun kaba nyngkong jong kane ka Group, u coach ka SLFC U Birendra Thapa, uba la lah ban btin lynti ïa kane ka klob ha u snem ba la lah, u la pynpaw, “Manla ki lympung ba phi ïalehkai, kam dei tang ban pynsngewbha ïa ki paidbah bad ki nongkyrshan. Phi kwah ban khur jingjop. Phi kwah ban poi shaduh ka phainal bad ban rah ïa ka trophy nam lahduh. Ha u snem ba la lah ngi la shah rem noh ha ka semi final. Ha kane ka kynti ngi kwah ban poi sha ka phainal bad ban jop ha kane ka lympung.”
Hynrei, wat hapdeng ka jingïaid lynti ka Lajong, u Thapa um khmih lynti ïa ka janmiet kaba suk. “Baroh ar ki dei ki kynhun kiba tbit bha. Ki la soi bun ki rangïalehkai kiba tbit na ka nongbah Shillong. Kan dei ka jingïalehkai kaba eh, hynrei ngin hap ban ïakhun tyngeh.”
Ha kawei pat ka liang ka Nongkseh kaba la rah ïa ka nam lahduh ha ka Meghalaya State League mynta u snem, ka la long ba la pynkhreh na ka bynta kane ka lympung watla ka dangdei ka sien kaba nyngkong ruh.
Kane ka klob ka la don ïa ki rangïalehkai ba kynsai kiba kynthup ïa u kapten u Hardy Cliff Nongbri, u ban hap ïakhun pyrshah ïa ka klob kaba rim jong u. Une rangïalehkai u la bat teng kum u kapten ka Shillong Lajong, ka la rung sha ka semi final ha ka aiom ïalehkai 133.
“Ka Shillong Lajong ka long ka kynhun kaba khlaiñ. Nga tip bha namar ngi ki dei ki paralok ba nga la ju ïalehkai lang mynshwa,” la ong u Hardy.
“Ngi don ïa ki rangïalehkai kiba kynsai, ki don ruh kiba la ïalehkai ha ka I-League bad ISL. Ngi don ruh ka jingïatylli kaba biang naduh ki junior haduh ki senior. Ngin pyrshang ban ïalehkai bha bad ban khur ïa ka jingjop.”
Na ka liang u coach kane ka Nongkseh u Joseph Naik u la pynpaw ka jingkyrmen skhem ba ki nongïalehkai jong u ki la ïoh ïa ka hok ban don hangne. “Ngi sngewnguh ïa kane ka kabu namar ba ka Durand Cup ka dei ka jingïalehkai kaba don nam bha,” u la bynrap.
“Ngi burom ïa ka Shillong Lajong, namar ka la long kaba paw ha kylleng jong ka ri. Hynrei ngi la trei shitom bha, bad mynta ka la dei ka por jong ngi ban pyndep ïa ka kamram.”
