Itanagar, Naitung:
Ka ïew khappud India-Myanmar kaba pawnam bha ha Pangsau Pass ha Arunachal Pradesh ha Changlang distrik ka la sdang treikam biang hadien ka jingsangeh kaba hynriew snem, kaba long ka sienjam kaba kongsan ban pynim biang ïa ka khaïi pateng, ban pynkhlaiñ ïa ka jingïadei ha ka liang ka ïoh ka kot bad ban kyntiew ïa ka jingïakylliang kolshor hapdeng kine ki ar tylli ki ri ba marjan.
Ïa kane ka jingpyntreikam biang ïa ka Border Haat la plie paidbah ha ka 30 tarik Naitung da u Myntri ka tnad khaïi pateng ka Arunachal Pradesh u Nyato Dukam.
Ha kane ka prokram plie paidbah la don lang u Advisor jong ka tnad khaïi pateng u Dr Mohesh Chai, u MLA ka thaiñ u Laisam Simai, u Secretary ka tnad khaïi pateng u Bullo Mamung, u Director u Toko Togur, u Additional Deputy Commissioner u Lekhandu Thungon bad kiwei kiwei ki heh sorkar bad ki nongshim bynta ha kane ka thaiñ.
Kane ka Pangsau Pass Border Haat, kaba don ha Nampong ha Changlang distrik, ka la plie biang ha ka 20 tarik, Naitung, 2026, hadien ba la khang slem bha.
Ki heh sorkar ki la ïathuh ba kane ka ïew kan treikam lai sngi man la u bnai, ha ka 10, 20 bad 30 tarik, kaba ai lad ïa ki briew kiba sah ha khappud ban ïashim bynta ha ki kam khaïi pateng.
