Shillong, Naitung 30
Ka Mawlai Sports Club ka la pynjem khnap ïa ka Laitkor SC haduh 5-0 kol ha ka jingïakhun kaba khatduh ka kylla ba nyngkong (first round) jong ka Shillong Premier Lague 2026 ba la pynlong da ka Shillong Sports Association ha ka sngi Palei ha SSA Stadium, Polo.
Kane kan dei kawei na ki nam jop kaba heh tam ha kaba sdang jong kane ka lympung mynta ka samoi, kaba ïa kine ki 5 tylli ki kol jong ka Mawlai SC, la thep da u Samlang Rympei (49′), Fairming Suting (52′), Wadshwa Latoo (55′), Basuklang Bina (71′) bad u Bajiedlang Rangslang (86′).
Ka khana jong kane ka jingïakhun ka long ba ka kylla step ka la kut shwa ha ka jingïakhaid ka bym shim la don satia mano mano ba lah ban pynkhih jar, kaba pynpaw ïa ka jingïabiang bor bha hapdeng kine ki ar kynhun.
Pynban dei tad haba la wan ban bteng ïa ka kylla miet, ba ki rangïalehkai jong ka Mawlai kiba la ïoh shuh shuh ïa ka jingbatai kaba bniah bha na la u coach u Bah Hering Shangpliang, ki la sdang ban kylla ka rukom ïalehkai jong ki, kaba na ka por sha ka por ki la sdang wat ban da lah ban sam lyngba ïa ka kut ïalehkai ka Laitkor bad ruh ban tynjuh bor bah bha naduh kaba sdang.
Ha kum kane ka sur ïalehkai, ba ki rangïalehkai ka Laitkor SC kiba la shah ñion tyngeh ba kim lah ba kin shan slem shuh ïalade kaba kiba bun na ki kol ba ki la shah thep ka dei kaba kim lah ban phai kylla shuh ïalade, hynrei satang ban shu ïohi ïa ka jingkhih kaba ir shi ir ka jar ka jong ki.
Hadien ba ka Mawlai ka la lah ba kan tam shakhmat da kumba ar kol, kaba itynnad ban ïohi ïa ki rangïalehkai ki jong ka pat ka long ba kim shim la kheiñ sting ne ban kynran dien, pynban na ka por sha ka por ki ïai bteng ban ñion beit shakhmat ka rukom ïalehkai ka jong ki, kaba hangne ka la nangbam shuh shuh ïa ka buit ka bor ïalehkai ki rangïalehkai jong ka Laitkor SC, tad haduh ba kim lah shuh ba kin peiphang ba da kumno ba kin lah ban tem ïa ka rukom ïalehkai kaba tbit bad kaba pnah jong ki rangïalehkai ka Mawlai SC.
Watla katta ruh ki la don pat ki khep ba ki rangïalehkai ka Laitkor ki la sdang ban sei madan ïa ka mynsiem ïakhun ka jong ki da ka jingpyrshang ban khyrwit jam bha ïa ka bol sha ka kol ka Mawlai, ïa kaba kine ki jingpyrshang lah pat ban ong ba kim shim la long kiba don jingma na ka ban pynshitom ïa u rangapkol ka Mawlai SC, u Lambhamiki Lamare.
Te kumta ka jingïakhun ka wat kaba ar (Round 2) kan bteng biang ha ka 4 tarik u Nailar ha kaba ka Sawmer SC kan ïakhun pyrshah ïa ka Rangdajied United FC ha ka por 4 baje nohphai sngi.
Ka Sawmer SC kan rung sha kane ka jingïakhun hadien ba ka la shah rem da 1-0 kol ha ka Langsning FC, katba ka Rangdajied United FC kan rung sha kane ka jingïakhun hadien ba ka la ïakhaid da mar 1-1 kol pyrshah ïa ka MLP F.T ha ka wat ba nyngkong.
