Shillong, Naitung 31
Ka Asmita Dey ka la thaw ïa ka khana ha ka sngi Thohdieng, na ka bynta ban long ka nongïalehkai Judo kaba nyngkong eh jong ka ri India ban khur ïa ka takma ksiar ha ka Commonwealth Games 2026 hadien ba ka la lah ban pynliem ïa ka Heidi Quach na Canada ha ka jingïakhun phainal jong ki kynthei kaba 48kg ha Glasgow.
Kane ka ‘thei ïalehkai ba 22 snem ka rta ka la lah ban khur jingjop da 2-1, hadien ba la lah ban pynpaw ïa ka jingtbit na ka bynta ban khur ïa katei ka takma na ka bynta ka jingïalehkai Judo. Kane ka jingjop jong ka, ka la pynïoh ban khur ruh ïa ka takma ksiar ba nyngkong jong ka na ka bynta ka India ha ka Commonwealth.
Ka jingïalehkai phainal ka la sdang da kaba husiar, ha kaba baroh arngut ki nongïalehkai Judo ki la ïakhun tyngeh. Ka Quach ka la sdang ban kamai hapdeng kane ka jingïakhun, hynrei ka Asmita kam shym la ailad ban shah rem ha kaba ka la ïakhun tyngeh ban kamai poiñ ha ka penalty shido. Katei ka ‘thei ïalehkai ka ri khala khala ka la lah ban pynïakhaid lyngba ka jinglah ban kamai poiñ.
Ka Asmita ka la nangkham sngewskhem katba ka jingïalehkai ka nangïaid, ka la nangjam shakhmat. Katba ar tylli ki jingpyrshang jong ka kim shym lah ban ïarap ha ka ban kamai point, hynrei kam shym la duh jingkyrmen watla ka Quach ka la sei bor bah. Hapdeng kane ka jingïakhun ka Asmita ka la lah ban kamai poiñ sa shisien pat na ka bynta ban kynjoh sha ka thong.
Kham mynshwa ha ka sngi Thohdieng, ka Asmita ka la ïakhun pyrshah ïa ka Sarah Adlington na Scotland ha ka semi final jong ka Golden Score kaba la khluit bha ban pyntikna ïa ka jingïoh takma na ka bynta ka India. Ka la sdang ïa ka jingïalehkai jong ka da ka jingjop pyrshah ïa ka nongïalehkai kaba na kaba Scotland ka Eva Ewing ha ka quarter final.
Kumba ka long mynta ka India ka la don ha ka kyrdan ba shiphew da kaba kamai 17 tylli ki takma (3 ki ksiar, 10 ki rupa bad 4 ki rnong). Katba ïa ka kyrdan ba hakhlieh dang bat da ka Australia kaba la khur 110 tylli ki takma (51 ki ksiar, 24 ki rupa bad 35 ki rnong). Ïa ka kyrdan ba-ar la bat da ka England kaba la ïoh 65 tylli ki takma bad balai ka Canada ryngkat ki 45 tylli ki takma.
