Shillong, Naitung 31
Ka Shillong Lajong FC ka la sdang da ka jingjop ha ka jingïalehkai kaba nyngkong jong ka Group-E ha ka 135th IndianOil Durand Cup, hadien ba ka la pynliem noh ïa ka Nongkseh S&CC da 2-0 kol ha ka sngi Thohdieng ha Jawa-harlal Nehru Stadium, Polo.
Kane ka nam jop ka la wan urlong lyngba ki kol ba la thep da u Ever-brightson Sana bad u Tremiki Lamurong na ka bynta ban khur ïa ki lai poiñ.
Kane ka jingïalehkai jong ka ‘Shillong Derby’ ka la long kaba itynnad ha kaba la wan ban sakhi da palat 11,000 ngut ki paidbah ban ai jingkyrshan ïa la ki jong ki kynhun. Kumba ka paw ka Shillong Lajong ka dei ka kynhun kaba la ïalehkai haduh lai sien ha kane ka lympung bad ha u snem ba la lah ka la rung sha ka semi final ha ka NorthEast United, kaba la khur syndon ïa ka nam lahduh. Katba ka Nongkseh ka la shim bynta ha ka sien kaba nyngkong eh ha kane ka lympung, hynrei ka dei pat ka kynhun kaba paw ha kane ka Jylla ha kaba ka la khur ïa ka nam lahduh ha ka Meghalaya State League 2026, kumjuh ïa ka Champions Cup 2025 nalor kiwei pat ki lympung.
Te kumta ha kane ka jingïakhun, u coach ka Shillong Lajong u Birendra Thapa u la sei da ka kynhun kaba khlaiñ naduh ba ka la wan ha ka kyrdan ba-ar ha ka Indian Football League 2025-26, ha kaba la wanrah ïa ki ar ngut ki rangïalehkai na Brazil kata u Arthur Pangaro bad u Jota. Katba u coach ka Nongkseh u Joseph Naik u la pynmih da u kapten barim ka SLFC u Hardy Cliff Nongbri nalor kiwei pat ki rangïalehkai kiba kynsai kiba la shim bynta tang ha ka Indian Super League bad ka Indian Football League.
Watla kine ki kynhun ki la ïakhun tyngeh bad ki la ïoh ïa ki katto katne ki kabu kiba biang ha ka kylla step, hynrei kim shym la lah ban pynurlong. U Jota u la ïoh ban shut najngai hadien ka jingïarap pynbuh da u Phrangki Buam, hynrei um shym la lah ban pynurlong.
Hadien katto katne por ba la bteng ïa ka kylla miet, ka Lajong ka la ïoh ïa ka kabu kaba biang ha kaba u Jota u la ïarap pynbuh ïa u Everbrightson Sana, hynrei um shym la lah ban pynurlong na ka daw ba u rangapkol ka Nongkseh u la lah ban pyllait na ka jingshah thep.
Dei ha ka minit kaba 70 ba ka Shillong Lajong ka la ïoh ban pynkhih jar lyngba u Everbrightson, ha kaba u rangapkol ka Nongkseh um shym la lah ban leh eiei. Hashwa ban wai artad ka Lajong ka la thep biang sa shi kol lyngba ka jingïarap pynbuh bol da u Phrangki Buam na ka bynta u Tremiki Lamurong, u bym shym la pynlehnohei ïa kane ka kaba ksiar bad ban khur syndon ïa ka jingjop.
Ka jingïalehkai jong kane ka group kan long biang ha ka 3 tarik hapdeng ka Langsning FC pyrshah ïa ka Mumbay FC ha ka por 7 baje janmiet. Katba mynta ka sngi ha Guwahati kan long hapdeng ka North East United FC pyrshah ïa ka Bodoland FC (Group F) ha ka por 4:30 nohphai sngi.
