Khliehriat, Naitung 31
Ka Nongthymme SC, Umrasiang United SC, bad ka Marchaphrang YWSC Donaskur ki la khur jingjop ha ka lympung ïalehkai 3rd Division Football Tournament ba la pynïaid da ka East Jaiñtia Hills District Football Association.
Ha ka jingïalehkai kaba la long ha ka sngi Thohdieng ha madan Diengshynrum, Khliehriat, ka Nongthymme SC ka la jop da 1-0 kol ïa ka Mynkre SC bad ïa kane la thep da u Sounder Sympli lyngba ka penalty ha ka minit 63.
Ha ka jingïalehkai kaba bud, ka Umrasiang United SC ka la pynliem noh da 3-1 ïa ka Pamra Paithlu SCSC. U Ritbha Lamurong u la thep ar kol ha ka minit 16 bad 52 bad kawei pat da u Luckystar Muksor (78). Katba ïa ka shi kol na ka Pamrapaithlu la thep da u Eiborlang Rymbai ha ka minit ba 19.
Haba phai sha kawei pat ka jingïalehkai, ka Marchaphrang YWSC Donaskur ka la jop da 3-1 kol ïa ka Moolang SC. Ïa ki kol na ka Marchaphrang la thep da u Pormi Papiah ha ka minit kaba 38, kumjuh u Damepaïa Suting (65) bad u Marcel Suting (75), katba na ka liang ka Moolang ka la pynphai kylla shi kol lyngba u Ester Rymbai ha ka minit 54.
