Shillong, Naitung 31
Hashwa ba ka Jylla kan pdiang ïa ka 39th National games 2027, ka Meghalaya Lawn Bowling Association (MLBA) ka la lah ban pynlong ha ka sien kaba nyngkong eh ïa ka Meghalaya State Lawn Bowling Championship 2026.
Ïa kane ka lympung la pynkut noh ha ka sngi Thohdieng ha Laitumkhrah Assamese Secondary School, Shillong ha kaba la wan shim bynta da ki nongïalehkai ki 11 tylli ki district jong ka Jylla kata na kiba na Garo Hills, Jaiñtia bad na East Khasi Hills.
Ïa kane ka lympung la sdang naduh ka 28 tarik mynta u bnai ha kaba la plie ïa ka da u Chairman ka Meghalaya State Planning Board u A.T Mondal kum u kongsan, ha kaba la ïadon lang ruh u Working President ka Meghalaya State Olympic Association (MSOA) Bah John F. Kharshiing, kumjuh u General Secretary ka MSOA Bah Finely Pariat.
Kumba ka paw kane ka lympung ka long shi bynta ban pynkhreh ïa ka National Games bad na kane ka lympung yn sa jied 80 ngut ki ban shah hikai pyntbit hashwa ban ïoh ïa kiba kham kynsai ki ban mihkhmat ïa ka Jylla sha katei ka lympung ka ban long ha u snem ban wan. Ïa kane ka kynhun yn ai jinghikai da u coach na Malaysia u Ramble Dallan Rice Oxley.
Na ka liang ka Vice President jong ka Meghalaya Lawn Bowling Association ka Kong Thobi Kharkongor bad ka Kong Rikhel Swett, General Secretary, ki la pynpaw ka jingkmen ban ïohi ïa ka jingtuid ki nongwan shim bynta lem bad ki nongkyrshan.
