Shillong, Naitung 31
Ka kynhun myntri jong ka Sorkar Pdeng ha ka sngi Thohdieng ka la mynjur ïa ka skhim Khelo India ba la pynthymmai bad pynbha ïa ka jingïarap sha ki synjuk ïalehkai ka ri ne ki National Sports Federations (ANSFs) kaba ha ka jinglut kaba T. 36,441 klur tyngka na ka bynta ka samoi treikam 2026-27 haduh 2030-31, kaba pyni ïa ka jingbei tyngka kaba heh tam jong ka ri ha ki kam ïalehkai naduh ba la ïoh ïa ka jinglaitluid.
Haba pynïaid ïa ka jingïalang da u Myntri Rangbahduh ka ri u Narendra Modi, ka kynhun myntri ka la ong ba kane ka prokram ba la pynïar ka thmu ban pynkhlaiñ ha ki kam ïalehkai jong ka ri India da kaba wad ïa ki sap ki phong naduh khynnah, ban kyntiew ïa ki lad ai jinghikai bad ban pynkhreh ïa ki nongïalehkai na ka bynta ki jingïakhun ha kylleng ka pyrthei, kynthup ïa ka Commonwealth Games 2030 bad ka jingtyrwa jong ka ri ban pdiang ïa ka Olympic bad ka Parampic Games.
Katkum ka kyrwoh ba la pyllait, la ong ba ka jingpynlut ba la mynjur ka long haduh phra shah ïa ka skhim Khelo India ba mynshwa, kaba pyni ïa ka jingïaleh jong ka sorkar ban pynlong ïa ki jingïalehkai kum u mawjam ba kongsan jong ka jingkyntiew ïa ki samla bad ka jingtei ïa ka ri hi baroh kawei.
Kane ka skhim ba la pynthymmai ka pynrung ïa ka lynti ban kyntiew ïa ki nongïalehkai, kaba ai jingkyrshan naduh ka jingithuh ïa ki sap bad ka jinghikai lyngba ki stad saian haduh ka jinghikai ïa ki riew pawkhmat (elite training) bad ka jingpynkhreh ïa ka Olympic. Ka pynïar ruh ïa ki jingïalehkai lyngba ki National Centres of Excellence, Khelo India Centres of Excellence, SAI Training Centres, Khelo India Accredited Academies, Khelo India Centres bad ka Youth Sports Company jong ki kynhun shipai.
Ban pynkhlaiñ ïa ki kam ïalehkai ha ki skul, ka sorkar ka la pyntreikam ïa ki Khelo India Feeder School bad ka Khelo India Utkrishta Vidyalaya, ki ban pynïasnoh ïa ki kam ïalehkai bad ka pule puthi bad ban pynsuk ban ithuh kham kloi ïa ki sap jong ki khynnah.
Kumba ka long mynta ha ka jylla Meghalaya ruh ki don 24 tylli ki Khelo India Centre ha kylleng jong ki 12 tylli ki district. Ki jingïalehkai ki kynthup ïa ka Football, Boxing, Athletics, Basketball, Archery, Badminton bad ka Table Tennis.
