Guwahati, Naitung:
U heh ka Bodoland Territorial Council (BTC) u Hagrama Mohilary ha ka 30 tarik, Naitung, u la pyllait paidbah ïa ka “Chief Relief Fund” ban ai jingïarap pisa na ka bynta ka koit ka khiah, ka pule puthi, ka jingïarap ha ki por ba jia ki jingshah lyngshop ha ki bor ka mariang bad ka bha ka miat jong ki briew ha kylleng ka thaiñ BTC.
Ïa kane ka pisa la plie paidbah paidbah ha ka ïingdorbar jong ka BTC ha Kokrajhar tang hadien ba la pynkut ïa ka dorbar mang tyngka jong ka BTC na ka bynta u snem mang tyngka 2026-27.
Katkum ka jingong jong ka bor synshar jong ka BTC, la thaw ïa kane ka fund ban pynïar ïa ka jingkyrshan sha ki briew kiba duna ha ka ïoh ka kot, ban ai jingïarap ha ka liang ka koit ka khiah, ban kyntiew ïa ka pule puthi bad ban shim ïa ki lad jingïarap bad pynbha pat ha ka por ba jia ki jingjia ba sngewsih. Ki jingmyntoi kin long kiba lah ban ïoh da ki briew khlem da kheiñ ïa ka niam, ka jait, ka jaitbynriew ne ka ktien.
Ha kane ka sngi, u Md Ilias Ansari uba long u heh spah u la noh synñiang T. 5 lak, katba u dkhot treikam ka BTC u Lakhi Das u la noh synñiang T.1 lak sha katei ka fund ba dang shu plie thymmai.
U Mohilary u la kyrpad ïa ki paidbah, ki seng bad ki nongkyrshan babha ban noh synñiang da kaba sngewrit sha kane ka jingthmu na ka bynta ka jingbha jingmiat kaba kham heh jong ki briew kiba sah ha ka thaiñ BTC.
Ki briew kiba kwah ban ai jingïarap ki lah ban noh synñiang lyngba ka portal ba pura jong ka fund, katba la pynbiang ruh ïa ka laiñ jingïarap ba kyrpang na ka bynta ki jingïarap bad ki jingkylli.
