Agartala, Naitung:
Kawei ka kompeni kaba la kyrshan da ka skulbah Tripura ka la pynbiang palat 2,000 litar ka um dih kaba khuid sha kumba 30 tylli ki longïing kiba la shah ktah ha ka jingshlei um ha ka Amguri jong ka Assam bad ki jaka ba marjan lyngba ka kor pynkhuid um kaba la ïoh ïa ka hok.
Ïa kane ka jingïarap la pynlong da u samla pule M.Tech u Ashim bad u nongtrei jong ka InstaWater u Santanu, kiba la pyntreikam ïa ka jaka pynkhuid um kaba lah ban rah ha ka thaiñ kaba la shah ktah ha ka jingshlei um ban pynbiang ïa ka um dih kaba khuid sha ki nongshong shnong kiba shah ktah.
U nongseng jong kane ka startup, u Prof Harjeet Nath, u Assistant Professor ha Tripura University, u la ong ba ïa kane ka kor pynkhuid mobile la shna na ka bynta ban pyntreikam sted ha ka por ba don ka jingshlei um, ki jingjia ba sngewsih bad ki jingeh ba ïadei bad ki briew.
U la batai ba kane ka portable unit ka lah ban pynkhuid ïa ka um ba la jakhlia na sla khyndew bad ka um ba tuid beit beit ha ka tyllong, kaba pynmih ïa ka um dih kaba khuid ha ki jaka ba ki rukom pynbiang um ba la ju pyndonkam ki la shah pynjulor ne shah pynthut.
“Ka jingïoh ïa ka um dih kaba khuid ka dei kawei na ki jingdonkam ba kongsan tam ha ka por ba jur ka jingshlei um. Lyngba kane ka buit stad tynrai ba la pynwandur ha Tripura, ngi thmu ban ai jingïarap mardor sha ki jaidbynriew kiba shah ktah katba ngi ïarap ban pynduna ïa ka jingma na ki jingpang ba mih na ka um. Ngi dang ïai bteng ban kyrshan ïa ki jingpyrshang ban ïakhun pyrshah ïa ki jingjia ba sngewsih ha kano kano ka jaka ba donkam,” ong u Nath.
U la bynrap ba kane ka jingthmu ka pyni kumno ba lah ban pynkylla ïa ka jingwad bniah bad jingpynwandur ba la pynshong nongrim ha ki skulbah sha ki lad ki lynti kiba lah ban leh na ka bynta ka jingpynïaid ïa ki jingjia ba sngewsih bad ka jingïarap ïa ki briew.
Ïa ka teknoloji pynkhuid um kaba lah ban rah la pynwandur ban pynthikna ïa ka jinglah ban ïoh kloi ïa ka um dih ha ki jaka ba shah ktah ha ka jingshah pynjulor ha kaba ki lad pynbiang um dih ba man ka por kim don ne ki la kylla long ki bym treikam shuh.
Katkum ka jingong u Nath, ka InstaWater ka la don bynta ha ki kam ai jingïarap ha kylleng ki bynta bapher bapher jong ka ri naduh ba la sdang ïa ka, da kaba pyndonkam ïa ki kor pynkhuid um ba ïaid lyngba jong ka ban pynbiang ïa ka um dih kaba khuid sha ki shnong kiba shah ktah ha ka jingshlei um bad kiwei kiwei ki jingjia ba sngewsih.
Ka jingïarap kaba khatduh eh ha Assam ka wan ha ka por ba katto katne ki longïing kiba shah ktah ha ka jingshlei um ki dang ïakhun pyrshah ïa ka jingduna jong ki jingshakri kiba kongsan, kynthup ïa ka jingïoh ïa ka um dih kaba khuid.
