Kolkata, Nailar 02
Ha kawei na ki jingïakynduh ha ka jingïakhun jong ka lympung 2026 Indian Oil Durand Cup jong ka jingïaid lynti ha kane ka snem, Ka Samaleswari Sporting ka la jop da ka jingïalehkai kaba itynnad bha ïa ka kynhun kaba khlain bor bha kata ka Mohammedan SC da 3-2 kol ha madan Vivekananda Yuba Bharati Krirangan kaba la long ha ka sngi U Blei 02 Nailar 2026 ha Kolkata.
Ha ka kyllastep ka Samaleswari Sporting ka la lah ban ïalehkai bha da ka ba ïada na ka jingshah thep kol, Katba ha ka minit kaba 11 ka Samaleswari ka la lah ban thep kol nyngkong lyngba u B. Bhat. Ha ka jingïoh mynsiem na ka kol kaba nyngkong kane ka kynkhun ka la lah ban pynbud sa ka kol kaba ar ha ka minit kaba 27 lyngba u M. Tareck kaban pynlong ban lamkhmat da 2-0 kol ha ka kylla step.
Katba Mohammedan ha ka kyllamiet ka la ïakhun tyngeh ha ka jingïalehkai da kaba beh thong lyngba ar tylli ki kol. Kata ha ka minit kaba 60 u Lalthankima u la ïoh ban tep ïa ka kol ba nyngkong na bynta ka kynhun katba 5 minit hadien la ïoh ban pynbud sa ka kol lyngba u Lalngaihsaka na bynta ka Mohammedan, kaba wanrah ïa ka jingïaryngkat da 2-2 kol ka bym poi pyrkhat bad ka jingïalehkai kaba itynnad shibun.
Hynrei hapdeng ka jingïakhun u V. Arjun u la long kum u nongpynjop ïa ka Samaleswari Sporting lyngba ka kol kaba lai kaba u la lah ban thep ha ka minit kaba 81, kaba long ka jingmyntoi bha ha ka por ba donkam bad ha ka por kaba sa tang khyndiat ban pynïoh da ka jingjop kaba itynnad kata 3-2 kol bad ïoh ban kamai baroh lai poiñ ha ka Group B.
