Shillong, Nailar 02
Ka Sanmer ka la ïoh ban thep kol slem bha ha ka jingïakhun hynrei ka la lah pat ban jop da 2-0 kol pyrshah ïa ka Lamlynti ban jop ha ka jingïakhun final jong ka lympung Shillong Sports Association’s Third Division 2026 kaba la long ha madan SSA Stadium ha ka sngi Saitjaiñ 02 Nailar 2026.
U Khrawkupar Nongbri u la sdang ban thep kol na bynta ka kynhun da ka ba thep kol da ka khlieh ha ka minit kaba 71 bad bud sa ka kol kaba ar lyngba u Emerald Jyrwa ha ka minit kaba 78 ban pynlam khmat ïa ka kynhun haduh ka minit ba 80.
U Khrawkupar u la ïoh rah ïa ka nam ‘Player of the Final’. Katba ïa ka nam ‘Top Scorer’ la pynkup hapdeng ar ngut kata ïa u Adelbor K Shun ka Lummawbah kumjuh ruh ïa u Vicky Kurkalang ka Pomlakrai, kiba baroh ar ngut kiba la ïoh ban thep saw kol. Ka Lummawbah kaba la rem bad leit phai ïing noh ha ka Super 8 stage, katba ka Pomlakrai kaba la poi haduh ki jingïalehkai semifinal.
KI ar tylli ki kynhun ïakhun final bad kiwei pat ki ar tylli ki kynhun ïakhun semifinal (Umiew Maw U Sam being the other) ki la shah kyntiew kyrdan sha kawei pat ka samoi lympung ïalehkai kata ka Second Division. Katba ka Nongumlong bad ka Iaitylli ki la shah pynhiar kyrdan noh sha ka Fourth Division.
Ka Sanmer ha kane ka jingjop kum ka lahduh ki la ïoh ban rah ïa ka trophi kum ka lahduh ryngkat ka khung pisa kaba T.80,000 tyngka na u President ka SSA u Bah Banteidor Lyngdoh. Katba ka Lamlynti ka la ïoh ban khur noh ïa ka song pisa kaba T.40,000 kum ka kynhun kaba wan ha ka kyrdan kaba ar.
Ha ka por ba sam ïa ki khusnam ha katei ka sngi ka SSA ka la pynkup burom ruh ïa ki nongpynïaid ïa ki jingïalehkai ka ta ïa u Pynskhemhame Mawthoh, u Jespar Syiemlieh bad ka Pipilmoris Wanniang halor ka jingpyndep (passing) jong ki ïa ka eksamin AIFF Level 5 ban don ha ka Category 5 referees/assistant referees.
