Shillong, Nailar 02
Ka India’s International Movement to Unite Nations (I.I.M.U.N.) ka la rakhe ïa ka International Chess Day, ha ka 20 tarik u Naitung na ka bynta ban rakhe kynmaw burom ïa ka jingseng jong ka International Chess Federation (FIDE) ha u snem 1924.
Te kumta kane ka I.I.M.U.N. ka la pynlong ïa ka prokram ai jingpynshai halor ka jingïalehkai chess ha kylleng jong ka Ri. Kane ka jingai jingpynshai kam dei tang ka jingai jinghikai ïa ki khynnah ïa kiei kiei kiba thymmai, hynrei ban ailad ïa ki ba kin nangsan ha kane ka jingïalehkai bad ba kin ieid bad sngewtynnad ïa ka.
Ha Shillong, la pynlong ha ka skul R.B. Anupchand da ka Zubee Shaikh kaba dei ka kynhun trei mon sngewbha jong ka I.I.M.U.N. Ki samla pule kim dei ki nongsdang namar kiba bun ki la tip lypa shaphang kane ka jingïalehkai, hadien ba ki la ïoh ban ïalehkai hapdeng ki klas.
